ما تلومشي حد ... شعر عبدالله صبري

ما تلومشي حد
الناس يادوبك شاي حليب
والكيف حساب الأفئدة
لا هتولد الأحلام رفاقة
ولا السنين باضت عدا
القصة مش خِضر وسفينة
الثقب أوسع من كدا
كانت هتغرق حتى لو من غير بحور
كانت هتولع وانت طفَّاية
لم الهوامش واكتب الآية
بسم الضمير الحُر جلاب الصُداع
بسم اللي عُمره ما كان بتاعنا وقُلنا ضاع
بسم الضفادع والأميبا والضباع
بسم الصباع اللي انكسر يوم المشاورة ع العبث
بسم الصباع
سجِّل ورايا وفك إيدك م الحدث
مش جدعنة م الشمس أصلا إنها تنور
ولا كان في بال زلزال يوقع بيت
الحكمة غلطة شاعر اتهوَّر
نبع المؤامرة فــ قولنا رُحت وجيت
المعنى مش جوا السياق ..
ولا حتى من برا
يا ابني الحاجات لا حلوة ولا مُرَّة
كل المُتَع ناقصة"
أصعب وجع خلصان 
طول الطريق رقصة
أطيب أمل قُرصان
ما تقولشي خان أو صان 
قول عدَّى من جنبي 
واهي كلها أسباب
للراحة والمعاناة 
الشئ شبيه معناه
لكنه مش هوَّ 
ومافيش أساسًا شيء 
له معنى من جوَّا
الحزن تحويجة 
والفرح تتويجة 
والعقل والويجا
طالعين لنفس الدور"
ما تلومشي حد مافيش حلول تنفع
ومادمت فوق الأرض راح تدفع
مانتاش جريح المرحلة المنفي
إنفي اشتراكك في اغتيال الدرب
الحرب حرب بقصف ولا حصار
مش كل مرة هيعقل الإعصار
يمكن خسرنا الراحة في الشارع
يمكن نسينا الحضن في النادي
جايز يكون اليأس بينادي
ما بينكسرش ابو جرح بيصارع
الآخرين : الرصف والتقرير
انا وانت مشوار المجاز والشوف
بالسعي نقدر نعتمر ونطوف
تفضل ظروف الوقت برضو ظروف
إحنا الأسامي وحلمنا الأفعال
الحالة عال طول ما الشغف بكفوف
والصورة جوا النص بتعافر
ما تقولشي إيد القبلة راحت فين
صلي بدموعك دا الوجع كافر
ما تلومشي حد وصاحب المأساة
واحضن غيابك قبل ما تسافر