مين اللي بيخبط يا خوف .. شعر شحاتة فكري
جوه الأوضة الضلمة ساعات
كان بياخدني شعور بالخوف
وانا جوَّاها كنت اتمنى
النور ييجي واقدر اشوف
وافضل احسّس على جدرانها
وامشي في قلب العتمة وادوُر
يمكن ألمس أوكرة بابها
أو شباك ويكون مكسور
أهرب منه بسرعه وانط
بشنطة حلمي في قلب النور
جوه الأوضة الضلمة ساعات
كنت بخاف من أيُّها صوت
واما حفيف الريح يتسرسب
من شباكها كنت بموت
وان فَكَّرْت اصرخ واتمرد
بيلجِّمني بسرعه سكوت
قلبي يقولي حاول تصبر
أهي أوقات ومسيرها تفوت
جوه الأوضة الضلمة ساعات
كنت باصبَّر قلبي كتير
واعمل م الأحزان سبورة
واعمل م الأحلام طباشير
وارسم عش جميل فوق شجره
بتصوصو جُوَّاه عصافير
وأغمَّض وأنام على صوتها
من غير لا مخده ولا سرير
أصل الضلمة ماهيش في الأوضة
دا السهل مع اليأس عسير
والنص الأصلي اللي بيفضل
وإن دقت ع الراس تفاسير
ما العصافير ناس بس بريش
والمكفوف بالحلم بصير
