تعالي احكيلي يا بطاطس
وقولي الحق لا تخبي
ده سعرك قب ما غاطس
وأنا غلبان وإيه ذنبي
،،،،،،،،،،،،،،،،،،،
مابين اليوم ودا التاني
الاقيكي بقيتي فوق
جنابك غالية رباني
تعالي اكلمك بالذوق
،،،،،،،،،،،،،،،،،،
قوليلي يا هارسة اعذاري
وسلقاني بجمر النار
شويتي كل أفكاري
وطبخاني وزيتك حار
،،،،،،،،،،،،،،،،،،،
يامحشية بوكستنا
وواقفة تسوي ع الهادي
في أزمتنا ومصيبتنا
وجاية بعند بتعادي
،،،،،،،،،،،،،،،،،،،
معاكي القوطة في الأزمة
لكن عارفيناها مجنونة
وأما غلاك بلا لازمة
أمانة تردي يا حنونة
،،،،،،،،،،،،،،،،،،،،
بقلك إيه يا أبو الإحساس
ياريت ماسمعش منك صوت
دي فرصة وجات لسيد الناس
ومش هيسيبها لحظة تفوت
،،،،،،،،،،،،،،،،،،،،
أهو عباني في مخازن
وصكر بالحديد الأبواب
وحط عليا ميت خازن
مافيش داعي لأي عتاب
،،،،،،،،،،،،،،،،،،،،،،
لأن حكايتي مفهومة
دي لعبة من قديم العصر
دي أيده حديد ومحكومة
ومنها الباشا سكن القصر
،،،،،،،،،،،،،،،،،
فامتلومنيش على سعري
لإني يادوب أنا سلعة
ولا مالكة ياناس أمري
ماهو واكلني كده والعة
،،،،،،،،،،،،،،،،،،،،
فلو تستغنى عني أسبوع
تلاقي سعري بقى في الأرض
قرار ومافيهش منه رجوع
ماهو طولها بنفس العرض
،،،،،،،،،،،،،،،أعجبني