فِي طْرِيقِي نِشْبَحْ عِينِيكْ
===============

فِي  طْرِيقِي نِشْبَحْ عِينِيكْ === تْنَادِينِي  كَايِنِّكْ مْعَايَا

رِيحَةْ عِطْرِكْ تِجْلِبْنِي لِيكْ === يَاسَاكْنَة بْلَادْ الحْنَايَا

  نْقَدِّمْ بِالْخَطْوَة نِْجِيكْ === خْيَالِكْ نْشُوفَهْ وْرَايَا

نتلفّت بالي نلاقيك === على يميني نشوفك ضوّاية

نخاف لاالرّيح يطفّيك === ياشمعة تضوّي الفلايا

ناخذ برنوسي نغطّيك === يقابلني ضوّك في سمايا

نجوم الله دايرة بيك === حوّامة لاتعصي وصايا

نعدّي بالسّاعة انّاجيك === نفيق نلقاني قدّام مرايا

لاالعيب فيّ لا فيك === والذّاكرة ماهي نسّاية

كل واحد يقلّي آشبيك === تكلّم في روحك بحذايا

برّة حل كتاب عليك === لاتاكلك وحوش الخلايا

نسكت مانحب نسمّيك === نتسبّب بنقصان دوايا

اعمل فيّ مايرضيك === سكّينك غايص في كلايا

نهز إيدي لله نشكيك === تسبقني محبتك جرّاية

عبدالستار زرّوقي

07_5_2012