جارى التحميل
استخدم زر ESC أو رجوع للعودة
..........(بحبك يامصر )..............
انا كنت جنبك ع الكنال
الخيمة بيت والأكل مش عايز سؤال
والقلب غيط فيه الجمال
مزروع بحب مصر وفرحة الانتصار
كنا ننام على حبها ام الرجال
وكان غطانا وقتها كان إنتظار
فجر يجي شمس تطلع في العمار
كان وريدي بيت لمصر المستعار
كانت عينيه شمسها طول النهار
كانت إيديا زرعها وسط العمار
كنت غطاها وضلها من غير فصال
كنا بنقعد في الثمر تحت القمر
أنا والعيال
كان الخناق على ودها فوق الرمال
من غير ماحد بيتأمر
كان السباق على حبها هو المجال
أنا لسه فاكر في السهر
نتمنى نعبر في الكنال
الحلم كان وحده الخبر
إمته هنكتب الإنتصار
كنت أما جوع أدعي القدر
وأملا كفوفي بالرمال
أشبع كأني في الحضر
معزوم على لحم الغزال
مصر الحبيبة اللي إنتظر
حبها كل الرجال
ياسعدي لما جاه خبر
عدي الكنال
شوفت سلاحي إتسحر
رفرف جناحي بسرعة طار
ع الضفة خدني وإتسعر
يقتل يهود في يمين شمال
وبإيدة بارليف إتعصر
بالماية كل الجسر سال
وفضلت أصرخ وأكبر
في الحقيقة ومش خيال
في لساني كان في صيامي سكر
لما لقيت اليهود يصرخوا زي الصغار
يجروا بسرعة يسلموا كل القرار
ماهوا جندي واخد ع الفرار
خايف يموت أو ينتظر تحت الحصار
كان ينحني على قدمي يعلن إعتذار
كان حلم عمري إني أكون جوه إنتصار
ربك أراد إني أكون طوبة في جدار
إني أكون حامل شعار
الله أكبر ياإنتصار
هنعيش حياتنا كلنا من غير مرار
رغم الرصاصة في البدن وذراعي طار
لكن يامصر فرحتي في كل دار
ووسام هشيله كل عمري لحد يوم الإحتضار
ماإنت الحبيبة اللي ف عيوني مهما دار
إنت يابلدي كل عمري وف حياتي المنار
فداك كل الغالي عندي
آبويا وأمي والعيال
وبإختصار أنت النهار
أنت الحقيقة والخيال
ماقدرش أعيش وأنت في مرار
..............(شعر).............
عبد الله السايح
