مطلوب غفير
يسهر علينا الليل بحاله
مش بماله
أو خياله
الدايرة واسعة زى بكرة
والوحشة ذكرى
والبنادق فوق كتافه
هيه دايما وقت برده
تكون لحافه
ملهوش شخير
حامل حياته
فوق كفوفه ليوم نفير
لا بقول يا بابا
أو حتى ماما
بيقول يارب
يختفى من بينا
داعش أو أوباما
ملعون طريق
بيشد فينا للشكل
والمقصلة
وديون ما اتخلى العين تنام
والمعضلة
فيناالكسل
بتربى زى جوزين حمام
ووقوفنا من غير الوضوء
وعلى المقام
فين ربنا
لما انسيناه
واتعبنا لف ف نفسنا
وتنهيدة آه
جمرتها تحرق فى الأنا
والخوف بيمرع عشبنا
ونقول ياعين
ياليل بلاش
جانا الغفير
والسر فيه والانتعاش
سلام سلاح
وسلام كفاح
بس اللى خاين يختفى
ملهوش جناح
بره المجرة سلعته
وبدون صباح
الشاعر وحيد راغب عضو اتحاد كتاب مصر