مجلة كل الخواطر:: أنا غلبان وسامحونى :: لشاعر الغلابة المبدع أ /: محمد ضباشه

أنا غلبان وسامحونى
لشاعر الغلابة : محمد ضباشه
أنا غلبان وسامحونى
مفيش فى اليد حصالة
ولا بعرف طريق بنكك
ولا كتبوا أسمى فى حوالة
بجيب الرزق بالعافية
وبتحايل على الدنيا
تدينى حتى ولو لقمة
تسد جوعى وفى ثانية
تتوه منى خطاويها
وأداديها بحاجات تانية
أقول يارب عديها
وعدينا برضا وصلاح
وأقعد على السبحة أستغفر
لناس برا عاشوها سداح
بشوفهم دايما قصاد عينى
وهى بتاكل فى بعضيها
وحرب على الجنية دايرة
ورب بيتنا حاميها
ورب الكل يلعنهم
علشان باعوا الرضا بجنية
وداسوا على العباد جهلا
ومافكروا بيعملوا كدا ليه
بطونهم بلاعة مفتوحة
بتبلع قوتنا بالأكراه
فى تمن حقنة تداوينا
أو هدمة على الجسد ستراة
أو لعبة فى عيد لأولادى
فى يوم يلعبوا بيها
أو حتى قوضة تحمينى 
من الدنيا وبلاويها
وارجع تانى واستغفر
وأقول يارب عديها
واقول الأه ما يسمعنى
كبيرنا اللى واخدينا وراه
لدنيا مش شبه منا
وشبة اللى مطبخنها معاه
وأقول الأه وبسكوتى
جابوا موتى العيال شيلاه
وتقول يا خلق مايصحش
دا مات من حسرته وبكاه
خايفين نلقى مصيرة فى يوم
ونعيش نفس دنيتة وأساه
ودمع العين يغسلنى
وكفنى صدقة م البشوات
اللى ياما سرقونا
ورمونى مع الأموات
ومراتى اسيبها تخدمهم
وابنى اسيبة فيها يتيم
ومن قبرى رسالة ليك
داخل وما فى جيبى ولا مليم