مجلة كل الخواطر:: مـقـطــوعة :: بقلم المبدع القدير أ / حمدي صالح

( مقطوعة )
حروفي منعكشة 
يمكن 
او مكسرة 
جايز 
وممكن اي كلام 
تقول عنها 
وتشوفها حتي كلام فارغ
كبيت بناه بنا
من غير ميزان ولا خيط 
حيطان مايلة 
ماهو 
لا انا شاعر ولا دياولو
وبخاف انزل بحور الشعر 
كفاية بطبش انا ف همي 
و عليا العيون تضحك 
تشوفه ع البر في شبر غريق
بتضحك ..عادي .ما تضحك 
بس انا مش اراجوز 
أو بلياتشو بدم خفيف
انا المدبوح بسكين الهم 
كطير بيفرفر من حلاوة الروح 
مسكين 
تحسبه بيرقص
وهو في دمه متحني
بالضبط انا زيه
من همي انا بضحك 
وم وجعي انا بسخر 
ايوه تقدر تقول ....ساخر 
ساخر حتي من نفسي
انا آهة وجع 
في الصدر مكبوتة 
نطقها قلمي م الالم كلمة 
باكية تنهي عمر السطر
وتعزف انفاسها مقطوعة 
وتختمها بنقطة قهر 
وم الاول تعزف غيرها نشاز اللحن
وبغير الحزن مش شاعر 
بس ليا حروف
و حروفي ناقص ع الورق 
تنطق ما هيش خرسا
بس بحس إسمعها 
هتلاقي بين السطور معني
و بيعافر 
حزين لابس توب ضحكة 
بهتانة وبتكابر 
وفيها متخبي بيتظاهر 
بس خلاص مش قااااادر
و بغير الحزن مش شاعر
حمدي صالح