جربينى أكون نهاية 
افتحيلى الباب وسدى 
بعد منى مفيش حبيب
السنابل جوا منى
طرحها نجمة وشموس 
والفؤوس ساكنة ف قلبى 
فاحتة زارعة حبى ليكى 
واردة نورها للى زيى 
نهر طيب 
ساعتى عمر ملوش نهاية 
برمجينى اكون عقاربك 
حركينى ف الدقايق والثوانى 
مستحيل أبقى رياح 
أو شوكة تايهة فى المعانى 
أو موجة حارة ف صيف بينهج 
أو شتا برد وأمانى 
مسك روحى فايحة ليكى 
شمى فيها نبض عمرى 
واستحمى انفاس بتخرج 
من ضلوعى
واشربينى كاس بشوقى 
فايضة سكر وجمر وجد 
وشعر طارح ألف وردة 
زرياب وثومة 
ولحن شارد فى الخيال 
عوامته عشق وعين ترد
جربينى أكون نهاية 
مش بداية خايفة منك 
دخلينى جوا ننك 
واشطبى كل الشطوط 
م الخرايط
مهما اجدف فيها باقى 
حلم خارج برا منى 
مهر شاطط
دوقينى مقام فنائى 
ورقصينى وقت جذبى 
وارتوائى 
لما نايك دمعه يسكن 
والحروف دايبة ف دمائى
يا ليالى العشق بوحى 
واستريحى 
الستاير مش بشاير 
والبروج أفلاك كتيرة 
كل منها كعب داير 
دورينى ف خط منها 
وامنحينى اعيش ف جذبك
المهم تكون عيونى 
باقية شايف جمال ملامحك 
افتحيلى إدين بتحضن 
قلبى منى 
ضمى حتى الخوف يفرفر 
أو يغرغر 
أو يموت 
والطفى بجنان واخدنى 
عصب عنى لو بعدت 
أو شردت 
أو قفلت الباب بدونى 
انت لو مقسومة ليه 
دخلينى الباب وسدى 
وبحرينى ف نور عيونك 
ألف ليلة لسندباد 
مرة يشرب من سماكى 
ومرة سيفه يكون رجوعه 
للوداد 
شدى فيه الحبل أطلع 
للسوارى 
اعرف النوة ورياحها 
والمحبة تكون مسارى 
قلب فيه 
وقلب ليه 
وكلهم لوتفتحيلى 
الباب أكون لك 
نسمة حلوة فى ليل مدارى 
عشق ناشع من جبينى 
وف عيونى نهار مندى 
سدى بعدى الباب وسدى 
بعد منى العشق ضاع
الشاعر وحيد راغب عضو اتحاد كتاب مصر