إشتغاله
*********
الوضع مش محتاج أواله
زى نور الشمس ساطع
زى سيف الحق قاطع
كل يوم عايشين فى حاله
ساعة نفرح ساعة نزعل
ساعة نعمل اشتغاله
اللى حاضر واللى غايب
واللى عايش ف الجلاله
كله خايف بكره يجى
كله خايف م الاهانه
اللي عايش بس ميت
واللي رافض للعداله
واللي شايف بس ساكت
واللي خايف م الخيانه
واللي خايف م الحقيقه
والحقيقه مش بريئه
واللي حاسس بالاهانه
أب شايل همّ بكره
يوم بيوم وعيال جعانه
لما يلقي الدنيا ظلمه
والكرامه في استهانه
لما يلقي جيبه فاضي
كل يوم بيزيد مهانه
تبقي فين هي العداله
زي حالة ناس كتيير
الشريف فيهم فقير
والحرامي يعني باشا
صوته أعلي م الوزير
واللي فرّط واللي قصر
واللي خرّب واللي دمّر
واللي خان فينا الامانه
ميت خساره ع الضمير
والمشاكل هي هي
يوم بيوم نفس القضيه
كل يوم نصبح في حاله
ساعه نفرح ساعه نزعل
ساعه نعمل اشتغاله
والغلابه ف كل حته
كل يوم ماليه الشوارع
اللي قاعد جنب حيطه
واللي نايم جنب جامع
كل يوم و الناس جعانه
ناس تدور ع الرغيف
وناس تدور ف الزباله
تبقي فين هي العداله
كل يوم عايشين في حاله
ساعه نفرح ساعه نزعل
ساعه نعمل إشتغاله
***********
بقلم / طه إبراهيم
