مجلة كل الخواطر / بياع البطاطا بقلم الشاعر / محمد حجاج

بيَّـاع البطاطا

بياع البطاطا صبي ما شاف حنِّية
قام الولد الفجرية
حط شوال البطا طا ع العربية
و حط خشب يولعه للتسوية
وسحب العربيه 
من بشتيل لميدان الحريه
وحط الخشب ف الفرن و ولعه
و لما البطا طا بقت مستوية
رفع اديه للسما 
و قال يا رب دى ساعة صبحية
ارزقنى برزق أخويا و أختى الصغيرة
و نادى بأعلى حِسُّه ف الميدان
البطاطا السخنة 
البطاطا المولعة
مستنى واحد ينفعه
و طلب من ربه 
لقمه هنية
جاله الرد طلقة فى قلبه
راح الولد فدا البطاطا المولعة
يا ناس الثورة قامت ليه
يا ناس الثورة 
قامت تطالب بالحرية
تطالب عيش عدالة اجتماعية
يا ناس الولد ده ذ نبه إيه
و لا كان عاملكوا إيه
ما كنش الولد م البلطجية 
ولا الحرامية
دا كان بيسعى على رزقه 
م الفجرية
غاب الولد و ما رجع بيته 
بعد المغربية
خرج أبوه و أمُّه 
يدوروا عليه
لفوا و لفوا لقوا العربية 
و لقوا جتته مرمية
يا حسرة أُمه عليه
يا لوعة أبوه 
و الدموع اتحجرت ف عينيه
خرج يجيب لأخواته لقمة طرية
رجع با لكفن شيلاه العربية
يا ناس ارحموا اللى ف البلد اتوقف حاله
يا ناس ممكن تكون دى ثورة
دى شغلة حرامية و بلطجية
أزمة ورا أزمة 
ومظاهرة ورا مظاهرة
و حكومة ملهاش لازمة
الكل داير ف ساقية
مربوط فيها بيدور عشان المية
والمية معنداه
ما الأرض عا لية
يا ناس البلد للأمن محتاجة
ايد بتبنى مش ايد هدامة
ايد تعلى عشان ولادنا الغلبانة
ايد تدور ساقية 
تسقى الأرض العطشانة
ايد تدوَّر ماكنة 
تنتج بدل المعونة الأمريكية
بدل الشحاتة 
من الدول العربية