مجلة كل الخواطر / من تحت تراب النوح ،،، الشاعرة/... عبيـــــر الجنـــــــدي..

لما الدنيا تشوفها 
ف ساعة ضيق
تشبه ثقب الابرة 
مخنوقة ..بتخنق
وان الضلمة ف عز النور 
بقالها طريق
افتح عدسة روحك 
شوفها شوية كبيرة 
وان جمالها ف جدول جارى 
ونسمة معدية تهفهف 
وطيور بتسبح وترفرف 
تملا السما بغناها 
قوم واحياها 
وضلل فوق من قلبك 
واطلع بيه السما طيران 
ليه بتخلى الوسوسة تكبر 
تعمى عيونك 
اربط جوا اللأ ..شجونك 
مطر رضا وحياة 
سمع كل نايات الدنيا 
أنينك 
واطفى شجاه 
وظنونك
خلى حنينك يمسك فيك 
ويعديك
كل جسور الوجع الصامت 
العنقاء راح تخرج 
تانى 
من تحت تراب النوح
ليه بوجعنا البوح 
وسيزيف راح نتخلص منه 
بين أحلام بتعافر تطلع
للنور 
وبين أوهام بنحطم فيها 
جوه الدايرة 
ووقت حصانا ما يرمح بينا 
ف سبق الحور 
وبين أحرفنا الدايخة 
وسط سطور 
هيه الدنيا ساعات بتعيط لينا 
وبتبكينا 
وساعات تتمهزأ بينا 
زى البنت العاشقة 
بين أتراب صخرية 
عمرك شوفت اتفجر منها 
المية 
حاول تحضن فيها وقت اللوم 
بوسها واعوم 
وانزل بحر جمالها 
ايوه 
فيها جمال العيرة 
زى صناعة تحت السلم 
من تايوان 
وفيها جمال القلب الصافى 
تلقى الدمغة عليه 
م الدرجة الأولى 
نفسى تعرف إن الفولة 
اتقسمت نصين 
وان النظرة السودة 
من غرابين 
وان الفرحة تشوفها 
فى بهجة طفل وطفلة 
وف شمسة بتنظر ليك
من ورا شباكها 
وان اهم قصيدتك 
كيف تختمها بقفلة 
تفضل بتزغزغ فيك 
بعسلها 
وتشوفها كمان ف سيول 
من فوق الجبل الشامخ 
قالت لازم أحيى شراقى 
الوادى البور 
افتح ضيق القلب تملى 
وانسى ساعات الجور 
انت ساعات ف الدنيا 
عشها عرض وطول 
لكن خلى جمال أخلاقك 
نولك 
وان العسل الصافى 
هو تملى ف قولك