( مجلة كل الخواطر ) عتاب الكلاب " بقلم الشاعر الرائع د / عبدالله منصور

عتاب الكلاب 
_______________
فيه يعاتب الكلب صاحبه لأنه يقابل وفاءه وإخلاصه بالجحود والاحتقار
يقول :
زيديني ظلماً .. يا دنيا زيدي
منا غصب عنى ماهوش بأيدي
.. خصلة هباب ف طبع الكلاب ،
مادمت صاحبي .. تبقى أنت سيدي
*********************
مرابط لبابك .. أحرص في دارك
، وافرق مابين عدوك وجارك
غفير وعضيض لو أشوف حرامي
، وبهز ديلى لو حد زارك
********************
أطقطق ودانى على البعد أحسك
وأقابلك وأهربد ف اللي يمسك
وقابع .. متابع اعد الصوابع ،
وعيب لو فتلة غابت تخصك
*******************
ومهما حصل .. أنا مخلص لدارى
، تشخط وتشتم .. ازعل وادارى
، وتضربني بالرجل قدام صحابي
.. شمّتْ فيا كلاب الحواري
*******************
بتهبر في لحمة ، وتبات ماليها
وترميلي عضمة وتتجبى بيها
بتذل فيه وتقسى عليه ..
ما دوقتنيش مره .. حاجه شاريها
*******************
وعندك قطه مدلعلى فيها
تغيظ فيه لما تطبطب عليها
ولو شفت حُرمة جميلة قصادك ،
تحب تغازلها .. تشبهها بيها ،
******************
ولما يصادفك راجل حقير
يا تنعته بيه .. يا بالحمير
تقوله : ( يا كلب يا بن الكلب ) ،
ودا في وجودي .. بيألم كتير
*******************
مخلص لصاحبي أنا طول حياتي
أسيبه يشخَّر وأنا أسهر ليلاتي
محدش يفكر يهوب لبيته
لانى طول الليل .. أهبهب وأهاتى
*******************
ورغم غلاسة قانى الكلاب
وحدفى بطوب والهوان والعذاب
تظل الكلاب هي رمز الوفاء ،
ومع بني آدم .. ما ينفع عتاب !!
زجل بقلم دكتور عبدالله منصور