قلب للبيع ومين يشتريه؟
ومين يشترى الحب اللى فيه؟
طب مين يداوى جرح ماليه
جارحه الهوى مالي شأن بيه
ساكن بين ضلوعي ومالي ملك فيه
طير وربيته رفرف على عش يواريه
قلب للبيع ومين يشترى مني
عمرى شاب ويفرق فى إيه سني
مالى غير شِعرى وصوتى
نظمت من دمعى لحن يرحم سكوتى
وقلت للهوى أروح بقى أغنى
أغنية جات حزينة والحزن صار فني
فى سوق الهوى لقيت ناس وناس
ناس بتعشق جرحك
وناس بتدور فيك عن الماس
وناس بتقتل قلبها
وناس بتبغى قمر وناس
وناس لاهية
وناس داهية
وناس متأصلة
وناس مالها فى الهوى أساس
قلت اعرض سلعتي
والسلعة دى قلبي
رحت أنور شمعتى
بس المكان داربي
حيرتنى يا قلبى ولا هواك حاربى
نديم هواك فاتك وهان عليه حربي
لمّ البضاعة وارجع بقى يا تاجر
ملكش فى البيع واللى اشتَرَى شاطر
حالف يدوس على الجراح
وما اشترى لهواك خاطر
ادفن فى قلبك هواك وارحم بقى روحي
مبقاش فيه ملاك يبكى من ألم نوحي
حبيبى يالّلِى هناك فداك قلبي.. عقلي وروحي
خالد العطار
