ما هو فيه واحد فيهم غلطان.. يا إما أعضاء جماعة الإخوان المسلمين وحزب الحرية والعدالة.. يا إما الإعلاميين فى شتى البرامج.. ■ أصلها حاجة تجنن.. يا إما الإخوان المسلمين قاعدين على أبواب استوديوهات البرامج وقافلينها عليهم ولا يسمحوا لأحد غيرهم بالتحدث فى شؤون الدولة.. يا إما السادة الإعلاميين خالت عليهم شوية الحركات اللى اتعملت على باب مدينة الإنتاج الإعلامى وشوية قصف الأقلام اللى حصل وخيبة الجرائد القومية وتحويلها لمقابر للكلام.. وأهى شوية مقالات بتتكتب ولا حد بيقراها وشوية ورق وشوية حبر وجبال من المرتجع الذى يتحول بعد ذلك إلى مسّاحة جيدة لزجاج النوافذ.. واستدعاء النائب العام لده وتحويل ده للمحاكمة وغلق قناة ده والحلاقة زلبطة لده فقالوا ف عقل بالهم.. وعلى إيه؟؟.. مش مستاهلة بهدلة وضرب وإهانة وسياحة داخلية فى الأقسام ومجمعات المحاكم.. إحنا نقلع أمخاخنا ونقطع الألسنة ونتحول إلى طيور مستأنسة أليفة من فصيلة طيور النهضة كده.. كل ما نعوز معلومة عن كيفية إدارة هذه الدولة.. نجيب أعضاء الإخوان والحزب.. ييجوا السادة يقعدوا حوالين المائدة المستديرة وهات يا فتى.. ■ وتتوالى الأسئلة اللى تفرس.. حاتعملوا إيه فى سياسة واقتصاد البلد؟؟.. طب الداخلية حاتطبق أنهى منهج فى عودة الأمن فى الوطن السعيد.. طب غزة أخبارها إيه، وإيه هى خطة دك الأنفاق وسياسة فتح المعابر.. طب والله لو سمحت يعنى.. شروط القرض إيه؟؟.. حلال يعنى ولا حرام؟؟.. طب لما اتناقش قبل كده وحصل عليه اعتراض جمعى من السادة اللى هو انتوا برضه فى مجلس الشعب كانت الفايدة هى هى المطلوبة دلوقتى ولّا كانت اكتر؟؟.. ولّا كانت المحروسة متسمية فايدة ساعتها وبعدين رحتوا السجل المدنى غيرتوا الاسم وخليتوه مصاريف إدارية؟؟.. طب واشحال التعليم؟؟.. كويس يعنى ولا حايفضل بعافية ومتخلف وأهبل ولا جرعة الهبل حاتزيد؟؟.. الصحة بقى سعادتك فى تدهور مستمر ومحتاجين حقن ولبوس وسرنجات وكده.. نلاقى إن شاء الله عندكوا؟؟.. إوعوا تقولوا مفيش وإنتوا عندكوا جوه.. بالنوسبة بقى لرحلة الصين.. حاتجيبولنا إيه معاكوا؟؟.. والنبى تجيبوا أى حاجة غير الموز.. ■ ويستمع السادة الضيوف بعناية شديدة جدا للأسئلة.. لأ وبيبقوا جايبين معاهم نوت يسجلوا فيها لحسن تفوتهم حاجة لا سمح الله.. وخد بقى.. سيل ينهمر من الإجابات الجاهزة، كأن العملية تمام التمام، وهما عارفين بالظبط حايعملوا إيه فى كل تفصيلة وف إيديهم حلول جميع المشاكل.. ويبصوا فى الملفات والدراسات والدفاتر اللى جايبينها معاهم.. ماهو الكلام مش بيطلع عشوائى كده.. ده مكتوب ومتسطر ومحفوظ وكله.. ■ يقعد المواطن مننا اللى كل يوم ملامحه بتتغير وتتحول إلى ملامح الواد سمسم ابن زينات صدقى الأهبل فى فيلم دهب بتاع فيروز وأنور وجدى.. وهو فاتق ضبه ومحول.. إنه يفهم حاجة.. أبتاً.. الكلام مستف وحلو وباللغة العربية الفصحى.. ومليان أرقام وانحناءات وتلبكات.. لكن لا يحوّق ولا يلوّق ولا يُسمن من جوع.. يطلع م القاعدة تشوفه رايح تقول عليه جاى.. مش فاهم ولا كلمة.. ولا مطمن بتلاتة تعريفة.. ■ نيجى بقى للأسئلة التى يطرحها الجمهور عبر المداخلات التليفونية والتى تحمل لوماً لهم واتهامات عنيفة تحتاج لردود.. تلاقى الابتسامة وسعت لحد ما جابت ورا الودان.. والطيابة نضحت على الوجوه وامتلأ الجو بعبير الدماثة الملائكية.. لكن ردود ماتلاقيش.. ■ ويبدأ كل فرد من السادة الضيوف فى تلاوة ديباجة الإيمان والورع بتاع نص دقيقة كده، ثم يستهل إجابته بـ«إحنا عندنا فى الجماعة أو الحزب قررنا...» ثم يتبعه الضيف الثانى بنفس الديباجة ويديها برضه «إحنا شايفين.. إحنا فكرنا.. إحنا بنقول.. إحنا نظامنا».. ■ إنتوا مين يا بهوات؟؟؟.. هو إحنا مش بقى عندنا رئيس جمهورية ناجح بانتخابات.. وعنده أغلبية إن شاء الله بنفر واحد؟؟.. مش جزء كبير مننا خد على نفسه عهد إنه حا يحترم نتيجة الانتخابات حتى لو مش موافق عليه ومختلف معاه على خط مستقيم ومتقدم صفوف المعارضة؟؟.. والراجل عين حكومة.. وعمال يعمل مجلس استشارى وهيئة مساعدين.. وانتوا.. نفس المجموعة المتصدرة برامج التوك شو مش طرف فى أى من هذه الجهات.. بتتكلموا عنه وعلى لسانه ليه؟؟؟؟؟؟؟؟.. بتوسعوا الفجوة بين الناس وبينه ليه؟؟؟ ■ بعضكم بتتلبسه روح الزعامة دون أى مناسبة ويتقمص شخصية رئيس الجمهورية ويقوم هابدنا تصريحات أحيانا عدائية ومستفزة جدا لعموم المصريين.. فتأججوا مشاعر ولا ليها تلاتين لازمة فى هذه الظروف.. يشعر بعدها الناس بأن كل ما الراجل يتقدم خطوة ويحاول يوصل الخيوط المقطوعة ترجعوه للخلف بدل الخطوة فرسخ بحاله.. بتقولوا كلام نيابة عنه وعن وزراء حكومته.. كلام لا يجب أن يصدر إلا من مسؤول.. عشان لو طلع فشنك نعرف نحاسبه.. وساعة الحساب ما يخلعش م المسؤولية ويقول مش أنا اللى قلت ولا صرحت.. ده الدكتور فلان والمحامى علان والشيخ أبصر مين.. ■ إنتم يا سادة ما تفرقوش عننا فى حاجة.. حالياً إنتوا شعب وإحنا شعب.. نستوى فى الحقوق والواجبات.. حزب زى أى حزب فى البلد.. اما الجماعة فماتخصناش ولا نعرفها، لحد ما تقننوا أوضاعكوا.. أو تحلوها بقى.. ده شأنكم.. والدكتور مرسى قالها واضحة لا تسمح بتأويلات أو سوء فهم أو مساحة لكلمة أصل إنتوا فهمتوا غلط.. هو كان يقصد حاجة تانية.. لأ هو ما يقصدش أى حاجة غير المُعلن.. أنا رئيس لكل المصريين.. وبالتالى المصريين لهم حاليا رئيس واحد.. مش هيئة رؤساء.. مش جمعية خيرية هى.. فإذا افترضتم أن الرئيس يجب أن يلتزم بفكر الجماعة ومنهج الحزب فقط فهذه ورطة.. لأن فكركم ومنهجكم لا يستقيم وعامة الطوائف والانتماءات.. وإذا كنتم تفترضون أن الرئيس بانتمائه لحزبكم مجبر على تنفيذ توجهاتكم فقط.. يبقى مش رئيس لكل المصريين.. وهذا لن يقبله الشعب.. على الإطلاق. ■ نريد أن نسمع تصريحات وإجابات على أسئلتنا من مسؤولين.. من الرئيس نفسه أو مكتبه أو متحدثه الرسمى.. ومن الوزراء شخصيا.. لأننا نسجل ونراقب ونعاتب ونحاكم.. وأحيانا نخلع.. ■ نيجى بقى للإعلاميين.. لما يبقى عندك سؤال يخص الدولة.. تجيب راجل من الدولة يرد عليه.. محتاج رأى مش رد أو قرار.. وسع دايرة البحث يا خويا.. اتعب نفسك وفريق إعدادك شوية يا حبيبى.. البلد مليانة علماء وخبراء ومستشارين وسياسيين من جميع الأطياف والاتجاهات.. عشان حتى نسمع كلام موزون مش ميزانه مايل وكفته مقبنة فى ناحية واحدة وفكر واحد.. محسسيننا إن الشعب كله بقى موظف عند حزب الحرية والعدالة.. وإن أعضاؤه هما بس اللى بيفهوا فى الكفت وباقى الشعب ما هو إلا غُطيان قُلل.