إسمح لى يا ريس ,, المفروض  ريس إنك وسط جماعتك مؤيد ,, ومن إمبارح التأييد مطلق وعلى علاته ,, ماعدا حزب النور الذى إعترض على جزء الحصانة الدائمة لأنك ياريس إنسان موش إله وقد تخطىء زى اى إنسان - كل إبن آدم خطاء , ده موش كلامنا ده كلام ربنا
طيب لما يكون المعترضين هم المنفلتين - يعنى اللى هم شوية فلول وشوية ليبراليين وشوية علمانيين وشوية كفرة والعياذ بالله
تقوم وإنت الراجل الكبير الحكيم الفاهم الواعى الراسى تخطب فمين
!!!!!؟؟
تخطب فى اللى قايلين آمين وألالا تخطب فى ولاد اللذين المناكفين !!!!!!
حضرتك ياريس - مع خالص إحترامى - حابب تسمع الهتاف وحابب تسمع التأييد وتقنع نفسك إنك مطاع مسموع الكلمة ماهو  حضرتك بقى منتخب
لكن حضرتك نسيت إنك منتخب بفارق 1 %
حضرتك نسيت إن معظم من إنتخبوك من خارج جماعتك كانو نكاية فى غيرك موش حب فيك
لو كنت ياريس جوز إمنا رغم عننا فإنى أحب أقول لسيادتك موقف إمنا الآن من جوازها منك ,,, ينطبق على الجوازة دى المثل الدارج خدتك عواز خدنك لواز خدتك أكيد العوازل كدت أنا روحى !!! لا مؤاخذة يا ريس ده مثل وحضرتك عارف ولاد بلدك حكايين
لو حضرتك إديت لنفسك فرصة تسمع الرأى الآخر
إسمع هتافات اللى فى التحرير
بلاش اللى فى التحرير .... شوية بلطجية وصيع وحرامية أو أونطجية
إسمع النخبة وهى بتحلل أفعال وقرارات سيادتكم
وإرجع الى حكم الله والشورى فيما بيننا
ولتعلم ياريس أننا لا نهاجمك وإنما نحن مصدومون فيك - بجد
وما نفعله الآن هو تنفيذ لكلامك أو بعض منه حينما حلفت الأيمانات الثلاث ... فقد قلت إن أخطأت فقومونى
قد تكون لا ترى فى أى كلام لك خطأ ما .... ولكن هذا شىء نسبى !!!! وعذرا مرة اخرى فنحن الشعب
وقد نكون نحن المغالون فى رد الفعل
وعليه أعتقد أنه على سيادتكم أن تعيد النظر فيما قلته وما إتخذته من قرارات علك تصل الى نقاط الضعف فيها وتستطيع أن تربأ صدعها وصدع العلاقة بينك وبين الشعب وحتى لا نترك فرصة لأى متدخل أو مستفيد أن يصطاد فى مائنا التى تعكرت
سيدى الرئيس صحيح أنا لم أنتخبك ولكنى أيضا لم أنتخب غيرك وهمى الأساسى هو هذا الوطن وحلمى هو الأمان فى شارعه ووسائل مواصلاته وفى أقسامه ومع ضباطه
وحلمى أن تتحق نهضة حقيقية ينعم بها إبنى ويفخر بأنه ينتمى الى هذه الأرض
وأقصى مبتغاى الآن ألا يخيب ظن بنى وطنى فى رئيس إنتخبوه - بعضهم - بعد ثورة أخذت من اعمارهم ومآقيهم المهر الكثير
أنا خلصت يا ريس , والله يعلم أنى لا أريد إلا الإصلاح ما إستطعت 
ألا هل بلغت اللهم فإشهد