أنا حانضم لحزب أستغفر الله العظيم الدستور الكافر.. رغم إنى مش فاهمة الكفر جاى منين.. من كلمة حزب اللى هى زى حزب النور والحرية والعدالة وكده.. ولاّ من كلمة الدستور..
مع إن فيه مجموعة من الإسلاميين واقعين فى غرام الدستور لدرجة الكلبشة والترفيص فى الأرض والإصرار على تسبيكه وتحييقه وتتبيله بمتبلاتهم ومحسناتهم اللغوية ومكسبات الطعم الرجعية اللى حاتلبسنا فى الحيط.. ورغم أنى عضو فى استغفر الله العظيم التيار الشعبى.. ما اللى ناس كتير مش فاهماه إن التيار الشعبى مش حزب.. ولا جبهة..ولا رئيسه حمدين صباحى.. ده تنظيم.. تنظيييييييييم.. حمدين مجرد صاحب الفكرة ورمز من رموز التيار اللى بيضم رموز أخرى كتير قوى ومنهم أعضاء فى أحزاب مختلفة منها الدستور مثلا.. لكنهم قرروا ينضموا للتيار ليعزفوا نغمة وطنية واحدة تجمع المصريين على فكرة السمو بالوطن ودفعه للخروج من أزماته الراهنة اللى على راسها الدستور الجديد الذى أسلفنا أنه سيتم هبده فوق نافوخنا فى حفل تدشين للجمجمة المتفشفشة المصرية الجديدة..
كل المطلوب أن يتخلى الناس عن سلبيتهم وهواية الهرى والنكت فى بعض وتأمل الفكرة بعقل جمعى واعى.. علينا أن نبتعد جميعا عن الداء الذى جرنا للخلف بونش وضيع وقتنا.. واستعراض فنون المهارة اللفظية وقواميس الشتيمة اللى باخت وما بقتش لا تحوق ولا تلوق ولا بتأثر فى جتة حد.. خلاص نحسنا وجلدنا تخن من كتر الهبل ده.. وعن الاستسلام للجان الإلكترونية التى تشيع الكراهية والسم الهارى بيننا وبعضنا بمنتهى الغباوة بيقع فى الفخ دون وعى..
تقوللى بقى يا انجاس يا مناكيد يا تييت تييت.. ولا بيفرق معانا.. بنقفل الصوت ونقعد نكركع م الضحك على تعبيرات الوش المفروس المهروس المقهور المنكاد المتغاظ..
■ مش فاهمة ليه على السيرة دى.. افتكرت عمرو أديب لما قال إن صفوت حجازى شتمه وقال عليه أقرع!!!!!!!!!.. ده على أساس إن الدماغ مزرّعة والشعر نازل ع العينين حاولها؟؟..
■ تصريحات عنترية موجهة لأعضاء مجلس الشعب المنحل.. ولا يهمكوا يا رجالة.. بلا محكمة دستورية بلا إدارية عُليا بلا فطش.. انتوا تنزلوا من بكره الصبح تروحوا على المجلس وتترصوا الرصة التاريخية إياها وتمارسوا زعيقكوا كما كنتم بالظبط.. وأول ما تعملوه.. جرى عالخزنة اصرفوا مستحقاتكوا وبدلاتكوا وغذاءاتكوا واللى متحوشلكوا فى السوبرماكو من فياجرا وفراخ والذى منه.. هو كده وعافية بقى.. وما ترجعش العربية يا كتاتنى..
■ تصريحات أخرى.. والله احنا لا نأخون الدولة.. احنا كتاكيت وقمورين وقاعدين فى حالنا.. لا بنبدل ولا بنحدل.. لكن هناك من يتأخون.. بيتلزقوا فينا وبيعملوا نفسيهم إخوان طمعا فى السلطة والجاه.. أوفف.. إوحوا بقى كده يا جماحة..
■ وله يا عمر.. اتلم ياد.. حاتجيبلى الكلام بعمايلك السودة دى.. اقعد وكن بقى بلاش النفخة الكرنبى اللى صايباك دى.. بتهزأ الناس ليه؟؟.. وايه حكاية حاحبسكوا دى؟؟.. كل ما حد يكلمك تقوله حاحبسك وحتاخد بالجزمة.. قسما عظما ان ما اتلميت لاكون مطوحة ضهر ايدى وعلى صدغك عدل.. آه ما تفتكرش نفسك حاتكبر عليا.. (إيه؟؟.. بكلم عمر ابنى.. حد له شوق ف حاجة؟؟..).
■ ساعات الواحد غصب عنه يقلب على قناة الجزيرة لمتابعة حدث شوارعى صدرت الأوامر ألا تغطيه كاميرات أخرى على الهواء.. يا بخت من كان النقيب خاله.. اللى بيشلنى بقى.. البار اللى بتنزل عليه رسائل يرسلها المتفرجون عبر الإس إم إس.. واحد بيكتب «مفيش بنزين فى سوهاج.. أنا واقف فى الطابور عند البنزينة بقالى ساعة».. طب ده باعت الرسالة دى ليه على شاشة الجزيرة؟؟؟.. حد بلغه إن الجزيرة لها من السلطة أن ترسل له جركن بنزين على سوهاج مثلا؟؟..
البيدوفيليا.. مرض العصر.. دوروا عليها انتوا بقى..
■ سقوط المظاهر لحظة انتفاء الأوامر والترهيب هو مقياس حقيقى للكذب.. لولا الرعب لما تبدل شكل المصريين بهذه الكيفية الكئيبة.. دخل الكذب والنفاق والتمثيل فى مكونات الجينات المصرية.. بدليل انهم ما كانوش كده.. ولو زال الرعب.. حايرجعوا طبيعيين فى ساعات.. تحب تراهن؟؟..
■ أعلنت جماعة الأمر بالمعروف والنهى عن المنكر بالسويس عن خروج المتهمين بقتل طالب الهندسة فى القريب العاجل بعفو رئاسى من الرئيس محمد مرسى، حيث تقدم عدد منهم إلى مكتب الرئاسة بمذكرة تطالب بالعفو الرئاسى عن المتهمين لبراءتهم من تهمة قتل طالب الهندسة بعد تأكيدهم أن المتهمين كانا يطبقان شرع الله فى نهى المواطنين عن المنكر.. خبر يتم تداوله على النت.. حد عنده فكرة جايبين الثقة دى منين؟؟؟؟؟؟؟؟؟؟؟
■ من ضمن القرارات المصيرية اللى الواحد عمال ياخدها اليومين دول.. زهقاً من الحال الواقف ورغبة فى البحث عن فرص استثمارية جديدة ومتطورة ومتنوعة مستغلا الثروة القومية والموارد الطبيعية لتحسين حاله.. قررت أشتغل شغلانة جديدة..
■ اشتريت ناقة.. جملاية يعنى.. وظبطتلها حظيرة لطيفة.. وسبت اللى ورايا واللى قدامى وقعدتلها ومعايا أدواتى.. بستلة وكوز بلاستيك وكرسى حمام خشب زغنطوط واستعديت.. اللى حاعمله ده مافيهوش مجهود.. أنا بس عليا اسنتر الكوز عالمصدر.. شحيحة وعنيدة بنت الإيه.. اتفسحى يا زكزوكة.. إإح يا زكزوكة.. قربعى بيرة ستلا يا زكزوكة.. أتارى الساهية النايحة الكهينة مابتديش أمارة.. بتقوم سايبة إذ فجأتن..
وانا أنشن بقى ولا الجول كيبر.. وأعبى فى البستلة المنتج القومى الجديد.. وساعات تدينى منتج مزدوج م اللى ماينفعش يتفصل.. وتبوظ الدفعة.. أقعد أستنى تانى.. أثناء مانا ملبوخة فى المشروع الصغير بتاعى إذ فوجئت بالجيران كلهم قلبوا بيوتهم مزارع تبويل جمال.. ماهو اللى تغلب به العب به..
والشارع كله طالع منه سيمفونية بعير بتزيط.. والزبالين بيعبوا فى أشولة مكتظة بشهادات طب وعلوم وصيدلة وترمى فى الشارع.. ناقصلى بقى حملة دعاية فى التليفزيون مكثفة بتشرح على نموذج بشرى ازاى لما شرب البول ده شعره نبّت وعضلاته قبت وطفولته شبت.. والفشل الكلوى والكبدى الوبائى اختفوا من فوق سطح الأرض بفضل العلم البولى اللى حايتلغمط بيه المجتمع الناهض السعيد.. تاخد شوب؟؟.