قصيدة "فلاش باك"

قيس المسافة بين ماضيك والآن

عدّ اللي مشيوا من هنا ل بُكرا

ووقّفوا المرسال؟!

اجرد وصفّي الكل في الغُربال!

ارجع "فلاش باك" للورا..

شوف اللي ماتوا وكانوا بيحبّوك

شوف قد إيه مشيوا الصُحاب وسابوك

في أسوأ الأحوال؟!

طب شوف بزمّة غلطتك يا حزين

شوف الكلام بقسوته راح فين لمين..

عدّ العيوب..

وسط المواقف، والهروب..

شوف قد إيه كنت انت مش في البال؟!

هوّن عليك، صلّح مصير نفسك

ضمّد بإيدك الجراح..

عوّد ضميرك يبقى مش مرتاح

-إلا إذا- حقّقت خطوة من طريق طوّال

ودّع بجد القسوة والأحزان

ارجع لطفلك اللي كان إنسان

ماتشيلش من ناسك

دا طبع غالب في البشر..

والطبع مش بالسهل يوم يتشال

عدّل في صورتك بس مش "فوتوشوب"

بيض سواد القلب

خلّيه بيبرُق من جديد..

يوصل لحد كمال

وامسح ماضيك كلّه بأستيكة وداع..

سطّر طريقك اللي ضل..

علّم ب "إكس" ع اللي باع..

اعدل ظروفك يا جدع..

ماتسبش نفسك للي قال واتقال!

#أمير_جميل