مستحيل
كلمات مرفت جابر
..........
حط المحال قُدّام عينيك
ف الحال هيصبح محتمل
إرمي ابتسامتك ع المدى
من ضحكتك ..
كل النواقص تكتمل
وتلاقي أزهار الأمل
ف الجو بتنتوّر عبير
قلبي الفراشه أوام يطير
يرقص ف أحضانك أمان
يبقى الزمان غير الزمان
بس المكان نفس المكان
عطر البنفسج والريحان
على سهوّه يجروا منّنا
يتسرسبوا ويملوا الهوا
صوت الكمنجه من بعيد
مع صوت فريد ( ياللا سوا )
وقلوبنا م الشوق ترتوى
نرقص فرح
نرقص دفا
نرقص هنا
ما بقاش في ابدا زيّنا
ولا قبلنا
ولا بعدنا
د احنا اللي ف كتاب الغرام
كل الكلام
كل النقط
كل الحروف
لا هنستخبّى من العيون
ولا يوم ح تمنعنا الظروف
ح نسيب جناح الشوق يطوف
من غير ما حاجه تمنعه
والليل قلوبنا تلمّعه
يبرق قوي من غير نجوم
وان عدّى ف الأجواء غيوم
من ضحكتك رح تنتهي
وان يوم لقيت قلبك سِِهي
ح ابعتله قلبي يفوّقه
وغرامي قبله ح يسبقُه
ويجيبه عندي بنظرتين
العِند مش ف الشوق يعيش
ومافيش هنا غير الحنين
خلّينا بالشوق مبسوطين
وبلاش تسيب طير الغرام
محبوس ما بين شجر العناد
مربوط على فروع الخصام
طول م النهار فارد إيديه
والشمس باعتالنا السلام
ما ناخدش م الأيام وجع
ولا ندّي للأيام دموع
وبلاش قلوبنا تبات ف جوع
أو تستحمّى بالجراح
كل المحال ويّاك متاح
بس اللي فعلا مستحيل
تبعدني عنّك خطوتين
أو قلبي يرضى الإنكسار
وان كان غرامك ليّا نار
صدّقني يا كل المنى
ف البُعد عنّك ...
إنتحار
..................................
