------------فراق الوالد----------------
--الشاعر عهد الحلفي-العراق -البصرة---
---------------------------------------
جانت كشخت البيت انتة الديوان
مو باب كلبك ينفتح للخطار
يالواعدتني بزفة مو نعشك جاي
يزرعلي طف ابصدري وبلحظة اندار
ومن شيعو جفيني مو عالتابوت
لان روحي بعدك بوية ما تهوى الدار
لبالي لمن تندفن هي وياك
الحفرة غربة شلون ما اصيرن جار
كل صفنة ذكرك عاشر وطف حسين
وعيوني خيمة ودمعي يلهبها بنار
ولشام مغرب ولسباية والحسرات
تلكن اهمومي بلهفة بالملكه الحار
مختنك بوية بعبرتي نوح ايتام
فاركه غالي وما عرف بية اصار
بية النفس مسجون وبصدره الليل
يتحسر عله الخيط لو شافة نهار
ودموعي جادر والصور عرضن بية
وللفركة هوسن هوسة اليطلب ثار
كبرك رمح من يكبل يهد اعضاي
ومونبضة احس بكلبي دكة بسمار
الخلوك موكد للجمر وكت العوز
روحك بجفهم جنت مثل الازهار
وطيبتك حضره اليكصد بروحه الضيك
ترده عيد الاهله باحلة التذكار
ورد اخذ تراب النجف وشتم بية
ريحة ابوي بعطره قصة وسرار
كاشخ بجارك علي يم الله هناك
وطوف روحك تعتني وية الزوار
