من يا دوب يومين كلمات الشاعر ثروت بكرى
من يا دوب يومين
رحت أخطب واحده جارتى
أيوه كان معايا أبويا
وأمى وحسين أبن خالتى
ولما أبوها سألنى عنى
شرحتله بصراحه حالتى
وأتفقنا وجبنا شبكه
ويوم فرحنا عزمت عيلتى
وفى ثوانى فرشت بيتى
وفى دقايق بقت مدامتى
وخلفتلى شريف وسامح
قبلهم حماده أبنى
وأنا عشان راجل صعيدى
الخلفه كانت مهمه عندى
فجأه بصيت لقيتها حامل
وفرحتنى بسموحه بنتى
وجه كريم أه خلفتلى
أخر العنقود حبيبى
هو ده اللى تاعبنى
وأختلفنا أنا والمدام
والطلاق كان غصب عنى
رحت متجوز ملاك
قلت أيه أللى جابرنى
أن أعيش فى الماضى وأبكى
ما أروح أشوف أللى تناسبنى
وجبت منها تلات عيال
أس أس وياسر وياسمين حبيبتى
فجأه بصيت فى المرايا
لقيتنى واحد مش عارفنى
عدت سنين يا ناس طويله
وأنا لسه فاكر والله كأنى
من يا دوب يومين
رحت أخطب واحده جارتى
أيوه كان معايا أبويا
وأمى وحسين أبن خالتى
ومات أبويا ومات حسين
وأتسرسبت أيامى منى
وكل ده كان من يومين
