مواصفات الزوجة النرجسية:

هنا حنتكلم بإذن الله عن نوع من الزوجات ممكن يكون نكدى بطبعه نكدى طول الوقت..نكدى كل ساعة...حنتكلم عن الزوجة ذات الشخصية النرجسية...طيب هى إيه الشخصية النرجسية دى...حنتكلم عن تفاصيلها بس حنقول دلوقت بسرعة كده إنها شخصية عندها إعجاب مفرط بالذات أو عشق للذات....طيب هو ده مرض واللا عرض واللا إيه؟ ده اسمه اضطراب شخصية واضطرابات الشخصية تعنى نمط من السلوك الشامل يعنى نمط سلوكى بنشوفه فى مواقف كتيرة....طيب وده حاجة الإنسان بيتولد بيها يعنى واللا بتحصل له بعد كده؟...الحقيقة إن العوامل البيئية الأسرية هى اللى بتلعب دور أساسى بس نقدر نقول إن بيكون فى استعداد وتكوين شخصى للبنى أدم يقابل ببيئة أسرية غير سوية تؤدى إلى ظهور اضطراب الشخصية...طيب الشخصية النرجسية شكل البيئة الأسرية بيكون إيه؟ بيئة أدت إلى عدم نمو الاتزان العاطفى لدى الأبناء...طبعاً مش كلهم لكن الشخص الذى يواجه نمط تربوى معين...وهو نمط يتسم إما بفرط التدليل أو العنف أو كلاهما...كلاهما تعنى أسوأ أنواع الأنماط التربوية لأنها تعنى عدم الثبات..فمرة بأدلعك بشكل مبالغ فيه أطلعك سابع سما ومرة أعاقبك عقاب شديد وبعنف وأنزلك سابع أرض..فيطلع الطفل متلخبط...أو شخصية متلخبطة ومن ضمن الشخصيات الملخبطة الشخصية النرجسية...فاضل بس قبل ما ندخل فى التفاصيل إننا لازم نعرف أن الشخصية النرجسية شخصية ذات تكوين نفسى هش ..شخص بيكون عنده انخفاض شديد فى تقدير الذات ...مش واثق من نفسه....عنده صعوبة فى التكيف مع الأخر...ومثله مثل باقى حالات اضطرابات الشخصية لايدرك مشكلته فهو يتعب اللى حواليه وهم اللى يعانوا ويشتكوا لكن صاحب الشخصية بيكون مش شايف حاجة من صفاته....وده نتيجة إنه بيستخدم مجموعة من الحيل العقلية البدائية التى تساعده على إخفاء حقيقته أمام نفسه كالإنكار والإسقاط ....وتعالوا ندخل فى تفاصيل موضوعنا...زى ما قلنا قبل كده إن ممكن من وقت للتانى الزوج يلاقى مراته عمالة تتكلم عن نفسها عمالة تبكته على العيشة وإنها مش شايفة غير المر من ناس مش بتقدر ولاتشوف تعبها وإنها بتعمل كذا وبتعمل كذا وهو كأنها ما شافت منه خير أبداً...وممكن يومين تلاتة كده تبان وكأنها قررت تهتم بنفسها وتشوف مشاكلها وتفوق لنفسها بقى....ده لو بيحصل فى فترات وبشكل غير متكرر وبعده تلاقى الزوجة رجعت لطبيعتها فهنا إحنا بنتكلم عن تقلبات مزاج ممكن تحصل مع ظروف وضغوط الحياة أو تقلبات المزاج الطبيعية التى تسبق الدورة الشهرية وهنا الزوج لازم يكون مدرك كويس للكلام ده..وفعلاً فى الغالب الزوج العاقل تلاقيه بيتسامح خاصة لما يعرف إن ده مش طبع الزوجة لكنها فترات ترى فيها الدنيا بشكل مختلف وكأنها نسيت نفسها وضحت من أجل ناس ماتستاهلش....لكن ماذا لو كان التركيز على الذات دون الأخرين أسلوب حياة؟ يعنى هو الطبع السائد طول الوقت؟ والزوج مهما يعمل علشان يرضى زوجته مافيش فايدة هى برضه طول الوقت منتقدة ومش راضية ومش شايفة غير نفسها وطلباتها ومشاكلها يبقى هنا فى الغالب إحنا بنتكلم عن الشخصية النرجسية....تعالوا بقى نعرف الشخصية النرجسية بشكل أكثر دقة حسب دليل التشخيص الأمريكى الرابع....الشخصية النرجسية هى شخصية لها نمط شامل من السلوك يتمثل فى الإحساس بالعظمة وضرورة التميز وأن يكون الشخص محور اهتمام وإعجاب الأخرين طوال الوقت مع عدم القدرة على الشعور بالأخر وهذا النمط السلوكى يبدأ فى الظهور فى مرحلة مبكرة من العمر فى أواخر المراهقة وبداية الرشد....وإن كنا بصراحة نقدر نقول إن فى شواهد بتكون موجودة من الطفولة بتقول إن الطفل ده مشروع شخصية نرجسية...زى الغيرة الشديدة والأنانية ورغبة الطفل طول الوقت إنه يكون محور اهتمام الأخرين....ودلوقت تعالوا نتكلم تفصيلاً عن هذا النمط السلوكى الشامل للشخصية النرجسية.....
-إحساس مبالغ فيه بالأهمية..تلاقيه عمال يتكلم عن إنجازاته طول الوقت...ومتوقع من الأخرين إنهم يشوفوا إنجازاته أو الحاجات اللى هو شايفها انجازات ويعاملوه على إنه الأفضل طول الوقت وإن اللى بيعمله لا حد عمله قبله ولاحد حيعرف يعمله بعده...
-بيحلم بنجاحات غير محدودة..وصاحب الشخصية دى ممكن يكون فعلاً ناجح...هم فعلاً بيحققوا نجاحات كتيرة...بس كمان خياله مليان بنجاح لانهائى..علشان يفضل دايماً متميز ومختلف ومقدر من الأخرين ويتكلموا عن نجاحه.
-اعتقاد أصيل بأنه لازم يعامل معاملة مختلفة....يصاحبه اعتقاد مزمن إن الناس اللى حواليه أقل من أنهم يفهموه وإنه كان لازم يعيش وسط ناس تانية من مستوى أعلى بكتير علشان يفهموه ويقدروه..
-شخصية إنتهازية فى كثير من الأحيان تستغل الأخرين من أجل تحقيق المأرب الخاصة وأحياناً يكون استغلاله معنوياًُ وده إن شاء الله حنفهمه وإحنا بنتلكم عن الأم النرجسية والأبناء الذين ينشئون فى أسرة بها أباء نرجسيون
والاستغلال الأخر المعنوى يعنى استخدام الأخر ليحافظ على تضخيم ذاته....يعنى إنت محتاج لى أنا حأعمل طلباتك(زى الأبناء مثلاً) اللى هى واجبات على الأم طبعاً...بشروط أنك تمجد ذاتى..(طلب لاشعورى ولايتم التعبير عنه لفظاً إنما علاقة تقوم الأم النرجسية ببرمجة الأبناء عليها) محتاج لى يبقى تعمل الحاجات اللى فى الدنيا اللى بتقول إنى أم ما فيش زيها... وطبعاً الحاجات دى ممكن يكون فيها إيذاء وتعطيل للنمو النفسى للإبن أو الإبنة....مثلاً أنا نمرة واحد فى حياتك...يبقى ممنوع يكون لك أصحاب بقى لك أصحاب يبقى حأتقلب عليك..يبقى حأسحب كل اللى بأقدمه لك....وكل هذه اتفاقات لاشعورية لا تعبر الأم عنها لفظياً لكنها برمجة تحدث مبكراً...وسيلى شرح وتفسير ذلك بإذن الله مع شرح الأم النرجسية.

-يتجنب الشخص النرجسى الإقتراب الحقيقى من الأخر....هو لايحب أن يتعمق فى فهم مشاعر الأخر...إنه اتخذ قراراه بألا يرى إلا مشاعره فقط...

تعالوا نتكلم عن مواصفات الزوجة النرجسية تحديداً:
-ماعندهاش تعاطف مع زوجها...طول الوقت عايزة الزوج يتكلم عن جمالها ومظهرها وإن ما فيش ست فى الدنيا زيها...وإن حظه من السما إنه اتجوزها....وده لازم يكون فى شكل إمدادات يومية لاتستقيم حياتهم الزوجية بدونها ويكون تقديره لها الذى تنشده..مادياً ومعنوياً...وبرضه مش حترضى أو حترضى شوية وترجع تانى كأن الزوج لا عمل حاجة حاجة ولاقدم حاجة.
-منتقدة طول الوقت للزوج...تبكته على القديم والجديد....
-لو حكى لها وفضفض يوم عن مشاكله فى الشغل أو مشاكله مع حد من الأصدقاء أو الأهل...ممكن تسمعه بس علشان تعرف بعد كده تخبطه بكلمة توجعه لو عمل حاجة ضايقتها أو قصر فى حقها...يعنى بتستغل اللى بيحكيه علشان تيجى فى موقف أخر وهى على خلاف معاه تقول له مثلاً....مش غريبة عليك إنك تعمل كذا ما أنت متخانق مع ...أو مش بتعرف تعامل زمايلك...ما أنت فشلت فى إنك ....مش منتظرة منك حاجة عدلة...أى تستغل ما يحكى ضده فى مواقف الشجاركسلاح تهزم به الزوج فى معركة نفسية عايزة تطلع منها منتصرة.
-ممكن تقول للزوج إنه كل حاجة فى حياتها وما تقدرش تعيش من غيره وبعدين يقصر فى حاجة خاصة الإمداد اليومى لتضخيم النرجسية...تبص تلاقيها أنكرت كل اللى فات....وتنزله سابع أرض وإنه....وإنه.... وعمرها ما شافت معاه يوم عدل
-غيرة من نجاح المحيطين بيها من أهلها من أهله من أصحابها من أصحابهم...لأ وممكن من نجاحه هو شخصياً فهى لاتستطيع أن ترى أن نجاح الزوج قد يعنى نجاح الأسرة ككل فهى تنظر لذاتها فقط
-طيب قدام الناس....ممكن الزوجة تعامل زوجها بشكل مختلف خالص يبان فيه قد إيه هم سعداء حتى يراها الأخرون ناجحة فى حياتها الزوجية....وحتى يغار من يراها من الرجال ويحسدون ذلك الزوج على زوجة يتمنوا جميعاً أن تكون زوجاتهم مثلها.

وألقاكم بإذن الله فى موضوع الزوجة النرجسية ومفهوم العلاقة الحميمة.

د.نهلة نور الدين حافظ
أخصائى الطب النفسى

المصدر: Narcissitic spouce by llan shrira
  • Currently 15/5 Stars.
  • 1 2 3 4 5
5 تصويتات / 7103 مشاهدة
نشرت فى 31 يوليو 2011 بواسطة Mostasharnafsi

ساحة النقاش

DrMaha

ماهو الفرق بين الشخصيه النرجسيه والشخصيه الهستريه ؟؟

nahlashujaa

الشخصية النرجسية متعبة فعلا لانها ببساطة لاترى الا مشاعرها ....ولا يهمها الا ظهورها بشكل مميز بغض النظر عن من هم حولها ...واعتقد ان من ظمن صفاتها هو عدم الربط بين تصرفاتها وتصرفات الاخرين ..تتعامل مع كل موقف على حدة ...

bird2

مرحبا اعطاك الله العافية على معلومات احب ان استفسر
هل استطيع أن اقول على الشخصية التي تقول دائما انها تفني حياتها من اجل الاخرين وهي لا تعرف وتتفهم مشاعرهم تحكم عليهم تلقائي من قبل توقعات هي تنشاها هل اقول عليها انه شخصية نرجسية
وشكرا

bird2 فى 1 سبتمبر 2011 شارك بالرد 1 ردود
Mostasharnafsi

هذه صفات تدل على غياب البصيرة وهى شائعة فى كثير من اضطرابات الشخصية وليست الشخصية النرجسية فقط..بإذن الله سنتكلم لاحقاً فى إعداد معالج نفسى عن اضطرابات الشخصية بالتفصيل

د.نهلة نور الدين حافظ

Mostasharnafsi
موقع يهدف لنشر الوعى بالصحة النفسية والتدريب على مهارات تطوير الذات من خلال برامج العلاج المعرفى السلوكى السيرة الذاتية: الاسم: نهلة نور الدين حافظ الجنسية: مصرية الحالة الاجتماعية: متزوجة وأم لطفلين المؤهلات الدراسية: ◊ بكالوريوس الطب والجراحة-قصر العيني- دفعة ديسمبر 1993-تقدير جيد جداً مع مرتبة الشرف. ◊ ماجستير الطب النفسي »

ابحث

تسجيل الدخول

عدد زيارات الموقع

311,987