** كرة القدم **
ملعب واسع و الجماهير حواليه ألافات 
ناس مبهورة 
قالوا انها مجانين الكورة 
بتهلل و تشجع فرقه و ماسكة رايات
حجزوا مكان في مدرج بدري
كله مركز جي بيجري
و مالأشغال واخدين أجازات
رجوا الأرض بصوت كالرعد و بالهتافات
إلعب شوط 
حاور فوت
سجل هدفك و اكسب ماتشك
باصي و رقص بالمزبوط
هز الشبكة و هز قلوبنا مع الأهداف
يلا يا جامد 
يالي معاك لقب الهداف
خليك ثابت إوعى تخاف
هي الكورة
المجنونة اللي بتسحرنا و شاغله البال
من يوم ما اخترعوها زمان و العالم قال
يا مدوّرة يا جنون السحر
يالّي جمعتي شعوب الدنيا بر و بحر 
مين مننا مالعبش و حاور بيكي زمان
في المدرسة أو جوا النادي
أو في الحارة لعبها كمان
دوري و كاس و محلي و عالم و أولومبيّة
و احترافات دولارات صفقات أخبار عالمية
و عشانك إتحدت كل فئات الشعب
و مشاكلك ولعت الدنيا و قامت حرب 
و تعصّب علشانك أعمي و سيّل دم 
ناس تتعصب تضرب تغضب جاتها الهم
نفسي تكوني يا كورة وقورة
روح رياضية و ناس مبهورة 
تهدينا أحلي الأوقات 
حارس مرمي هجوم و باكات 
و اللاعيبة الجامدة يا كورة 
سايبه معانا كتير علامات 
بيبو و بليه و الحضري و بوشكاش قول بركات
و التوأم و كمان مارادونا أبو الحركات 
و الجوهري و شحاته طاهر
صالح سليم كان لاعب ماهر
رابح ماجر
البرازيل ويا الأسباني 
أرجنتين و مكن ألماني 
و الكاميروني كمان و الغاني
بس الحاجة اللي مضايقاني 
خلتني زعلان مقهور
إستادنا مافهوش جمهور
و مدرج فاضي و مهجور
إمتى يا كورة تعودي لأمنك و الجمهور يرجعلك تاني 
إمتى يا كورة
** همسات رمضانية **
** محمود بيومي **