** الطريق إلى الجنة **
إللي قال ان الطريق للجنة ساهل
يبقى جاهل
و اللي قال الدنيا غدارة بتهلك كل غافل
يبقى عاقل
حكمة الخالق في خلقه
إنها تبقى غريبة
يوم تضلّك
يوم تدلّك
يوم عدوة و يوم حبيبة
فيها ليل عكسه النهار
فيها سكر و المرار
فيها أبيض
فيها أسود
فيها جنة و فيها نار
فيها عزّه و فيها ذٌل
في ملايكة بتحفظك لو يوم تضلّ
فيها إبليس اللعين مترصدك
واخد العهد القديم إنه لازم يرصدك
عارف السكة اللي يقدر بيها يوصل مطرحك
و يدمرك
من بداية خلق اَدم ألف مرة بيكرهك
ربنا أمره و قاله تعالي و اسجد قول أمين
خلق إيدي هو أدم المكرّم رغم إنه خلق طين
قاله لا يا رب كلّا
مش راح اسجد ألف كلّا
قاله إخسأ يا لعين
بعدها غيّرله إسمه
و اتمسخ من شكل رسمه
و انطرد من عطف ربه
و اتوصم شيطان رجيم
يا بن أدم مهما كان
إوعي تنسى يوم عدوك
إوعي من إبليس يضلك
أو يذلك
إستعذ بالله و خلّي حكمتك نورك و ضلّك
الشيطان عارف مداخلك
ألف حيلة يخترعها تقطع الأرحام لأهلك
كل يوم بيزيد في جهلك
يلاّ إغوي
يلّا إهلك
نفسه دايماً تبقي باعد عن الاهك
تارك الصلوات وحاطط متعة الدنيا تجاهك
فاكر إن الدنيا جاهك
يمنعك عطف اليتيم
يجعل الصدقة في عينك خلفها الفقر المقيم
تبقي جاحد
تبقي شارد
تبقي وسط الناس ذميم
لكن الحكمة الكبيرة
إن ربك خلّي كيده كتير ضعيف
رغم إنه شيطان مخيف
كلمة التوبة يا مؤمن لو تقولها
لو فقلبك باليقين دايماً شايلها
لو تكرر لاستعاذة
يخنث الملعون و يهرب
يبقي مسخ مالهش عاذة
* * همسات رمضانية .. محمود بيومي * *
