" مستنيين"
الدم هان
وابنك يا بلدى بيتقتل
قدام عنيكى
مين اللى خان؟
مين اللى باعك يا بلد
وجنى عليكى؟
مين السبب؟
ولحد أمتى راح نتوه
إيه إنكتب؟
الدم ليه بيبعتــــروه
السكة مليانه بحفر
والقلب من همه اتقهر
دم ودمـــوع
وظلام وجوع
والصمت صرخة بألف أه
عمال يقول العـــدل تاه
رافضك ومش راضى الرجوع
يا شمس مسجونه بغمام
مات الغلام
والأب شابت دمعته
أصبح حطام
والام لابسة توب حداد
راحوا الولاد
والبدر جوة عتمته
جواه ألام
يا حلم ضايع مننا
إنت هناك وإحنا هنا
مين اللى غرب خطوتك؟
فين سكتك؟
ليه دمعتك؟
جففها وارجع ضٌمنا
رجع ميزان العدل
جايز يوم نفوق
جايز غيوم الشمس تدبل
والغيمة تتحول شروق
جايز نعود
ونلاقى لوجودك مكان
نعرف حقيقة اللى خان
واللى عليه الدم هان
جايز كمان
ننسى اللى نسانا الزمن
ونعيش زمان
جايز يا بكرة تبتسم
والحلم يرجع يترسم
فوق الشفايف غصن ورد
مستنى يا بُكرانا رد
والمح يا بلدى ضحكتك
مبـــــــــــــــــدورة ود
ونحس تانى بالأمان
بقلم
محمود وحيد