** التمر **
رسولنا قالها زمان النخلة عمّتنا
إبداع قدير منان من نفس طينتنا
من بعد ما ربنا سوي النبي اَدم
من طينة باقية نمت في الأصل نخلتنا
*
ده مش كلام مبتكر ده كلام رسول الله
و النخلة غير الشجر في شكلها و بهاه
أمعن معايا النظر شوف الجمال أشكال
مفروده مثل البشر مكسية عز وجاه
*
في كل موسم سنة تطرح بلح الوان
زغلول سماني رطب و التمر زاد رمضان
اللي بدونه مافيش فرحة صيام لينا
أصله وصية نبينا محمد العدنان
*
التمر سُنّة و طعمه عالفطار معروف
لما تسمّي توحّد و الفؤاد ملهوف
تكسب ثواب نيتك حسنات عددها ألوف
بالتمر تروي و ترجع أخر الروقان
*
التمر ويا حليب ده مزاج و عال العال
و لو تبلّه فتين و قراصيا للأطفال
احسن غذاء للجسد فيه الشفا موصوف
زاد الفقير و الغني في العيشة و الترحال
*
تمر المدينة شفا تمر العراق ترياق
تمر العريش معشقة و هدية للعشاق
تاكله في ليلة سمر ويا الحبيب تلقاه
طعم الهنا و المني و الحب و الأشواق
همسات رمضانية. .محمود بيومي