يرحم زمان وايام زمان
==============
مسحراتى يا زين الملاح
بادقدق وانادى هل الصباح
والفجر نوره شقشق و لاح
المولى بينادى
حى على صلاة وفلاح
اتسحرو ولبوا الندى
واغتنموا من رمضان
دا السعى للصوم
خير من النوم
دى ليالى سمحه
بعديها فرحه
بعيد فطر بعد الصوم
هنكبر بتكبيره
ونقول سوا كلنا
اهل مع عيلة
والله بعوده يا رمضان
*
*
شوف كنا فين وبقينا فين
فين اللى كانو حاولين طبالى
اسره وعيله متجمعين
مشتاق لستى
وخالتى و جدى
مشتاق لخالى
ومشتاق لعمى
مشتاق يا جارى
ودوبنى شوقى وموالى
مشتاق للمه ساعة الادان
مشتاق لرفعت والنقشبندى
مشتاق يا خلق حنينى قاتلنى
ردد وعيد وقول معانا يرحم زمان
هتفرج يا عم ربك معين
مين كان يصدق بس مين
والله ودارت الدنيا بينا
والعمر عدى والسنين
وولى جرى
من بين ايدنا يا خلق الزمان
واحنا اللى كنا صغيرين
بنفس الشوارع والمكان
كنا الصغار الفرحانين
بفوانيس وزينه لرمضان
نغنى ونلعب بالبلالين
وندق على كل البيبان
نطوف على كل الحبايب
بفانوس بشمعه سبع الوان
نطلب العاده بكل بساطه
تسعد وتدينا الجيران
ياميش وبندق وعين جمل
وتمر وجوز وزبيب كمان
وكنافه وقطايف
ونقلى وارسيا وتين
والله بعوده يا رمضان
فين زمن الفن الجميل
فطوطه وكاتكوته وسمير
فين بس هما بوجى و طمطم
والف ليله وماندو يا عم ووردشان
فين ريما ومشكاح سارق الاكفان
فين نيلى والتنبوكه والخطبه
فين عمو فؤاد وفين روبى
وفين فهمى عبد الحميد
وفين الف ليلة و شريهان
هاتجنن ياخلق
واشتقت فعلا لايام زمان
ومين هيسمعنى
الله يصبرنى
على العمر اللى ولا
وراح يا ناس منى
فين البرامج اللى كانت بتاسرنا
فينك يا شعراوى
ومجالس العلم يا امامنا
فينك يا مكاوى
وانت بتنشد تسحرنا
وفين برنامجنا
اسماء ربنا الحسنى
وفينك وفين لياليك
يا عمنا الراوى
على اللى راح منا
يارب هون وصبرنا
وعلى اللى جى
قادر تقدرنا يا رب وتعنا
اقبل دعنا
واللطف بنا وفى رحابك اقبلنا
من الداخلين من الريان اكتبنا
عوضنا بالاخرة يا كريم عنا
عن اللى راح بالدنيا دى منا
بصحبة نبينا الهادى تجمعنا
وبزمرة الصيمين من الريان دخلنا
على حوضك بايد حبيبك اطعمنا
شربة لا ظما بعدها ابدا
الكل فانى يا ربى
وانت اللى باقيلنا
على صوم رمضان قوينا
وعلى الصلاة والزكاه عنا
وعلى قيامه وتلاوة القران
يارب العباد تقدرنا
*
*
مسحراتى بنادى
يا خلق صلو على الهادى
اربع ليالى ولو من رمضان
قومو اتسحرو وصلو وصومو
الفجر لاح لبى الندا
حى على صلاة وفلاح
يا بخت اللى يفوز بقيامه
دى ليالى سمحه
بعديها فرحه
ويا سعد اللى بصيامه
هيدخل الجنه من الريان
صباحكوا هادى ونهاره نادى
وبعوده يا رمضان
بقلم
=== الشاعر \ راسم محمد
