(((((يا خلق هوووو)))))
-----------------------محمودعمارالزلبانى
يا خلق فهمونى
خلاص العقل قرب
مش لازم تنصفونى
ونفسى منى أهرب
أصحى الصبح بدرى
يا دوب ألحق أصلى
وأنزل لشغلى أجرى
مش عارف ايه حاصلى
ألاقى الكل سارح
واللى نازل يشاور
واللى دمعه سايح
ولنفسه شغال يحاور
واللى نايم ع الرصيف
والشبشب تحت راسه
حاضن نص الرغيف
والمر هو كاسه
وولد نازل عياط
وأمه ماسكه ايده
مفكوك منه الرباط
مش عارف ايه يفيده
واللى مبرق عنيه
طالع منها الشرار
واللى فى لحظه تلاقيه
يصرخ –العيشة مرار
مش لاقى لقمة حاف
بردان يا خلق هوو
سرقوا منى اللحاف
ارجوكوو ترجعوه
واللى مستنى الفطار
نفسه ياكل زى غيره
واللى مقضيها هزار
ومش عارف خط سيره
واللى يصرخ جيبى فاضى
يخرب بيت أم الحرامى
لاأنا عارف أشكى ولا أقاضى
ومين ها يسمع كلامى
وصلت شغلى بعدحيره
خدت طريقى كله ماشى
روحت لقيت ع البق سيره
المرتب قال ما جاشى
يا خلق ساكن بالايجار
وكرهت نفسى من السلف
وبقالى ما يعرفش الهزار
دا فى شخطه قطعنى الخلف
كان أملى فى شوية خضار
الحلل عندى تقول عمد
قاعده فاضيه ليل نهار
والصحون جابت ولد
ما أقدرش أرجع للعيال
فاضى وبحظى الدكر
طب أمد ايدى للسؤال
أشحت طبيخى يا بشر
الخلق عايشه معزورين
والهم راكب ع الكتاف
ياما خلايق مطحونين
مش لاقيه حتى اللقمةحاف
وخلق تانى مرتا حين
العيشة وياهم هنى
يا رب لينا كون معين
دا الكل رايح للفنى
-------------محمودعمارالزلبانى