المرأة
لما الخالق خلق المرأة
خد من آدم ضلع وقال
ان المرأة دي نبع العاطفة
اما آدم ده موال

لما تعمد ربي ف خلقه
يخلق حوا وهو نايم
خوفا انه ممكن يكره
ويكون حبه ليها دايم

فضل المرأة علي البشرية
لو هنقوله عاوزين عمر
هي الام.. الاخت.. الزوجة
هي النبض المطحون مر

لما رسولنا الغالي يوصِّي
نحسن ليها بكل الخير
يبقي بيزرع جوه قلوبنا
حب كبير ليها وللغير

و من الحكمة انها تتعلم
لاجل تكون مدرسة لاولاها
مش بالجهل العقل يبلِّم
نحصد جيل وارث لعنادها

وزي مافيها الست الكاملة
فيها كمان منقوصة الكيف
بس الكلمة الحلوة عاملة
زي النسمة ف حر الصيف

جرب تبقي ليها آمان
راح تلاقيها اجمل عنوان
انما تظهر غدر وخسة
مش هتشوف غير كيد وهوان

انا مش بانقص حق رجالها
هي حقيقة وبأعلن عنها
لو يعاملها بحق الدين
يكسب راح تحويه بحنانها

شجرة خير لو تروي بذورها
تلقي ثمارها حنين وسلام
لو لك ملكة تبقي اميرها
وتعيش ليها بطل الاحلام

ميرفت حمودة