سكوت البوح

كل ما امسك قلمي واكتب
يصرخ حرفي يقول لي كفاية
اضغط اقول له طيب أعتب
يكسر سِنُّه يقول دي حكاية
تكتبي ايه وانتي الموجوعة
لما تلاقي قلوب نساية
حتي الصمت بيصرخ جوفه
يرجع يتألم جوايا
ارجع احاول اكتب تاني
القي السطر ماهوش موجود
بيوريني انه مالوش لزمة
نكتب امثال مالها وجود
اللي يبيع العشرة ف لحظة
فاكر انه في يوم هيعود
واللي بينكر حق قصاده
فاكر عمره مالوهش حدود
واللي بينسي لافضال غيره
ناكر حتي يكون موجود
عندك حق ياقلمي بتصرخ
تتمرد علي كل ردود
لكن انت لساني لو اسكت
وانت كلامي وقت النوح
لما بتصرخ كل حروفي
بتعزي جوايا الروح
ليه تتمرد يوم وتسيبني
ليه تبقي طيري المدبوح
من غيرك راح اعيش الوحدة
من غيرك مش هاقدر ابوح

الشاعرة ميرفت حموده