ميديا الخير# مسلم والذين معه | بقلم : محمد طه

بسم الله والصلاة والسلام على رسول الله....

اولا وقبل اى حاجة...تخيل كده ان بينك وبين حلمك خطوتين ،اهم حلم فى حياتك قرب منك اوووى ومبقاش فيه بينك وبينه الاخطوتين ،جواز ،شغل ،حياة سعيدة ،منصب كويس .

حيبقى شعورك ايه..واستعدادك ليه ايه....؟؟؟؟
اكيد مش حتقدر تنام ولا تقدر تفكر غير في ازاى تستعدله وتحضرله وتفضل مستنييه .. صح ..

احنا بقى اهم حلم عايشين ليه فى حياتنا بيننا وبينه خطوتين برضه بس إحنا
مش زى الناس الواعية اللى عندها عقل وقادرة تستناه عشان تكسبه .

حلمنا اللى بيقرب مننا هو مصمم يقرب واحنا مصممين نبعد مصممين نملا قلوبنا صدى وقسوة مصمميين نخلى الشيطان يضحك علينا

ربنا بيدينا هدايا تنجينا واحنا ندير وشوشنا ونبعد عن كل حاجة حلوة وفى الاخر نقول احنا ايه؟ وليه ؟ وفين ؟ .

مش حنفوق الا واحنا بين ايديه ،ونقول ظلمنا نفسنا ليه ؟

يوم عرفة .. افضل يوم طلعت عليه الشمس انا صحيح مش حتكلم عنه بس حبيت افكرك بالهدية .

هدية ربنا لعباده جاية وهتبقى بين إيديك
لكن احنا للاسف  مش بنرتاح ومش بنكون مبسوطين الا لما الشيطان يضحك علينا.

اهم هدية فى حياتك من يوم ولادتك كل سنة بتجيلك اكتر من مرة لكن عزها فى اليوم ده هى العتق من النار .

ربنا عايز ينجيك من النار واحنا مصممين نعيش قلوبنا فى نار
عايز ينجيك من نار قلبك فى الدنيا بطاعته وحبه وحب عباده وفى الاخرة بالنجاة والعتق واحنا مصممين نملاها نار بالبعد عنه وبحشوها حقد وغل وكره وفى الاخرة بذنوبنا .

ليه يامسلمين...؟

فهمونى براحة .. ياترى دى رسالتنا !! ده دورنا !! ده اللى ربنا حابب يشوفك فيه وخلقك عشانه!!.

طيب احنا نستحق تكريم ربنا....؟؟؟نستحق نكون مسلمين....

ليه يااخوات دينى وعرضى نبيت بعض زعلانين ...ليه تبيت اخوك قلبه مكلوم ..ليه تظلمه...

ليه اخوك او اختك يباتوا دموعهم مالية عنيهم..وجرحهم مالى قلبهم...

ياحبايبى مش ده...مش ده دورنا....
احنا دورنا نكون واحد...واحد زى ما الرسول كان يحب يشوفنا....

حج...كلنا زى بعض ..ِكل واحد ..لبس واحد...كلمة واحدة..مكان واحد..قلب واحد...

صلاة...كلنا جنب بعض..فى كتف بعض...انفاسنا واحدة..دعواتنا واحدة...

صوم..كلنا نجوع مع بعض...نعطش مع بعض..ناكل مع بعض..نفرح مع بعض..كله وقت واحد...

زكاة...كلنا نكفى بعض ..ونفرح بعض..الغنى يفرح بفرحة الفقير وطاعته لربنا..والفقير يفرح بقلب اخوه اللى عليه وبكرم ربنا....

شهادة..كلنا كلمة واحدة تجمعنا...........لا اله الا الله محمد رسول الله...

احنا فين عقولنا؟؟؟؟ ليه مفهمناش كل الحكم دى....ليه الشيطان غيبنا ...

هو مش هى دى اركان الاسلام....طيب ليه مفهمتهاش يامسلم....

  مسلم....صفة ولا اسم ولا نعت ولا مبتدا ولا خبر ولا فعل ولا مفعول به....

احنا اييييه....؟؟؟
انت معرفتش رسالتك ..ولا عرفت حياتك ..ولا تستحق نعيش...

مسلم..من سلم الناس من لسانه ويده....
مسلم..لا تسلموا حتى تحابوا...

مسلم...

معلش اعذرونى..مش حتكلم على يوم عرفة لانكم تعرفوه اكتر منى....انا حابب اتكلم على حاجة واحدة...وباذن الله مش حطول...

بص معايا للاية دى...
{مُّحَمَّدٌ رَّسُولُ اللَّهِ وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ تَرَاهُمْ رُكَّعاً سُجَّداً يَبْتَغُونَ فَضْلاً مِّنَ اللَّهِ وَرِضْوَاناً سِيمَاهُمْ فِي وُجُوهِهِم مِّنْ أَثَرِ السُّجُودِ ذَلِكَ مَثَلُهُمْ فِي التَّوْرَاةِ وَمَثَلُهُمْ فِي الْإِنجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَى عَلَى سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُم مَّغْفِرَةً وَأَجْراً عَظِيماً }الفتح29

شوف ربنا بيقول ايه على اتباع النبى...بيقول عليهم الرحمة مالية قلوبهم على بعض....

معندهومش شدة وغلظة الا على الكفار....

تراحمهم واخوتهم وحبهم لبعض..زى الزرع اللى بيكبر واحدة واحدة...لحد ماينمو ويخضر ويثمر...
لدرجة تغيظ غير المسلمين من الشكل ده...

سامحنا يارب....
سامحنا يارب....احنا زرعنا مليناه حقد وقسوة وغل وسوء ظن....

سامحنا يارب...احنا مقدرناش نفهم كلامك ونفهم اللى انت عايزه مننا...

سامحنا يارب...قلوبنا وقوتنا وعقلنا مش بنستخدمه الا عشان نقهر بعض...

سامحنا يارب...ولائنا بقى لغير اخواتنا..وبرائنا بقى من دمى ودينى وعرضى...
اخويا المسلم..

سامحنا يارسول الله....مكناش عند ظنك بينا...
لا افشينا سلام ولا طعمنا طعام....

سامحنا يارسول الله..حبينا كل حاجة فى الدنيا واتعلقنا بيها الا ديننا واخواتنا...

سامحنا...مقدرناش نحافظ على اعراض بعض...بهتنا بعض..واغتابنا بعض..وكمان بنحارب بعض...

سامحنا....احنا مش معاك...

قلتلنا ان دم اخواتنا واعراضهم واموالهم...حرمتهم اكتر من الكعبة...
لكن ياحبيبى الاغبياء مبيتعلموش بالساهل...

قتلنا فى بعض...وجرحنا بعض..روح وجسد...وكسرنا شركات بعض..وهدينا اموال بعض...

جه اليوم ان احبااابك..وااااه من احبابك دى للى يفهمها...
جه اليوم ياحبيبى ..ان المسلم يروع اخوه...ويمسك له سلاح...ويجرى وراه هو وولاده ونسائه...

جه اليوم اللى المسلم يخون اخوه..ويتربص بيه...ويستناه وهو امن ومع اولاده عشان يفتك بيه وميققدرش التانى يرد عليه...

يااااا ع اللى بنعمله فى نفسنا...حرام ..والله حرام يامسلمين...

عذرا....احنا مش اد الرسالة....

سامحنا..........

يامسلمين....

هو رب واحد...ودين واحد ..ورسالة واحدة....

ياتبقوا رجاااالة...اشدااااااء على الكفار ..رحماء بينكم...
ياتبقوا همج غوغاء جهلة...متستحقوش لقب مسلم....

" المسلم من سلم المسلمون من لسانه، ويده "

دون تلميح لاى حاجة....انا حبيت اقدم اعتذار بالنيابة عنكم لله ولرسوله....

وحبيت افكر نفسى وافكركم....ان قلوبنا حتفضل تايهة لحد ماهدية ربنا تفوت...بعد كده حتفوقوا..بس بعد فوات الاوان...وتيجى فرصة تانية..والشيطان يضحك علينا تانى....ونفوق تانى بس برضه بعد فوات الاوان...

نحذر يااخواتى....مش عايزين الفوقة الكبرى تبقى واحنا بين ايدين ربنا...وهو بيسالك عملت ايه فى دينك ونفسك....

لو عايز تبقى معاه....
اعمل اللى كان بيتمناه.....

اخوكم الفقير لله تعالى..محمدطه...