الشاعر/احمد محمود عوض سعيد يكتب في/مجلة الاتحاد الدولي للمؤلفين العرب

الكبير كبير
لو مكنشى لك كبير
اشترى بمالك كبير
حكمه اللى سبقونا قالوها
لجل يفهمها البصير
الكبير هو الامان
هو رمانة الميزان
لو فى مره الدهر خان
تلقى لك وياه نصير
----------------------
الكبير مش بس سن
والا صوت عالى يرن
الكبير اعمال كبيره
مهما اجسادهم تئن
قبل ما بياخد بيدى
وقبل ما بيطلب يادى
وان حكم دايما يبدى
غيره عنه ولا يمن
---------------------------
الكبير ما يقولشى نفسى
وبعدى لو يجى الطوفان
لو سمع مين قال يادرسى
يسبقه  بالاه حنان
هو اب وهو ام
هو اخ وهو عم
مش قرابة بس دم
لجل يديك الامان
-------------------------------
الكبير وياه بتكبر
وان بعدت عنه تصغر
النعاج الشارده عرضه
للذئاب تنهش وتنحر
لو بعدت عن راعيك
واختزلت الكل فيك
داست الدنيا عليك
وان حاولت تقوم ما تقدر
------------------------------------
الكبير فى الشده جنبك
وقتها تسند عليه
يبقى مخرج لك فى كربك
تنشلك م الغوص ايديه
وقت حيرة الخوف دليل
يحتويك صبره الجميل
قبل ما تضل السبيل
يبقى بوصله معاك تدلك
--------------------------------------
الكبير فى الحق حد
ما يطا طيش ويهزه ريح
لو يفيض الشر سد
وف رؤاه  واضح صريح
لا الهوى ولا شىء يضله
والجميع امن فى ظله
قلب وافى يساعى كله
شخصه ارفع م المديح
--------------------------------------
الكبير مش باختيار
او يعين بقرار
او بيسقط بالتقادم
او يبرمج  او يدار
الكبير فطره ومواهب
فكر عالى وصمت راهب
خبره تصقلها التجارب
حكمه  ترعى باقتدار
-----------------------------
الكبير مش زى ناس
عينه دائما ع الميراث
مش مهم فى مين بيسرق
او يجور على مين وداس
لو في اخت ياكل حقوقها
يصنع الاشياء تعوقها
او يختلق اسانيد يسوقها
لجل يحرمها الميراث
--------------------------------------
لو قالتلوا فين حقوقى
زى شرع الله ما قال
يتخلق لها الف نورى
ويا شياطين الضلال
اللى بيجامل لظالم
واللى يخفيله المعالم
وكله ع الغلبان-- يعالم
مين هيورث مين يا خال
---------------------------------------
شوفوا الكبير وارتضوا
من قبل ما تضيعوا
ولفوا روحكم بيه
لو حتى هتجوعوا
مركب بدون ربان
الموج هيلعب بيه
وازاى يكون فى امان
وحيتان كتير حواليه
لا شط  له هيبان
ولا نجوم تهديه
اصحوا الطوفان لو حان
بالغصب هتطيعوا-
احمد محمود عوض سعيد
الرحامنة/فارسكور/دمياط