شعر/ اشرف حنفى على * وبقينـــــــــــا ايــــــــــــــــــــــــــــــــــــــــــه ؟ *

* وبقينـــــــــــا ايــــــــــــــــــــــــــــــــــــــــــه ؟ *
شعارات ولحيه وتكشيره .. والاسم آل ايه : متأسلم .. قناع ياخد وقته ويزول .. وصاحبه يرجع يتندم .. يا اخوانا عليكم والله حرام .. عملتوا من دينا بضاعه .. ده دينا عمره ما كان سلعه .. ولا جهنم شماعه .. والا انتو بس اللى عاجبكم .. تدوله جنتكو هديه ؟ * باِدينا عملنا كده فينا .. جبناكوا علشان تسقونا .. علقم من مر الأيام .. كرهنا حتى نفسينا .. لا يومنا حسينا بطعمه .. ولا بكره عاوزينه يجينا .. ضلام بيوت وضلام أنفس .. وبلطجه وخطف وتهليب .. فين الوطن وفين همه ؟ .. جاوبونى ياطمعنين فى السلطه .. ياللى نبضاتكم جواها غل مع خيانه : اِمتى هتعرفوا ان ده عيب .. يا ناس فين صدق النيه؟ * يامصر ياما شوفتى زمان .. ولسه برضه بتآسى .. غمه وهتزول بايدينا .. مفيش غيرنا حاسس بينا .. اصرارنا هيغير بكره .. وترجع مصرنا لينا .. واحة محبه وبر أمان .. لا عمرها بتسأل انسان عن اسمه حتى أو دينه .. على طول فاتحه له الأحضان .. وكل اللى يجينا شاريينه .. يا اخوانا الدين للديان .. بتفتشوا قلوبنا كده ليه ؟ * قالوا بالاسلام راح نحكم .. الدفه مالت ليه بيكم ؟ .. غلا وحرمان وبطاله .. وناس جوه بيوتها وخايفه .. اخواتنا بتتقتل منا .. اخواتنا بتتشرد منا .. اخواتنا بتتخطف منا .. وعينكوا شايفه وموش شايفه .. ريسنا ليه يحكمه مرشد ..ده دمنا دم الأحرار .. مش هتقدروا تدوسوا علينا .. علشان كرامتنا دى من نار .. وطول عمرها غاليه أبيه * مسيحى مسلم ايد واحده .. والقلب نابض بمحبه .. لا حقد هيفرق بينا .. ولا غلكوا بيشعل نارنا .. بنعبد ربنا بسماحه .. وايديكوا ف دمنا سباحه .. هنعيش ف وحده لآخر العمر .. أيامكوا ف توب العار بتجر .. موش احنا اللى أبدا هنطاطى .. ده دمنا احنا رجوله .. محال علينا نبيع أوطان .. عشان صفقه ولا عموله .. وطنا ده غالى علينا .. وحبه ماشى ف شرايينا .. اتمرد دى موش كلمه وبس .. دى معنى جوه الروح يتحس .. اتمرد عشان متبكيش على بكره .. وتقولها بالدمع النازف : يا ريتها شمسه ما شافتنا .. اتمرد مصرنا ترجع لينا .. وناخدها تانى ف أحضانا .. مصر محتاجه الينا .. نصونها دايما فى عنينا .. ما هتبقى أحلى غير بينا .. عزيمتنا جواها شراره .. قويه جدا جباره .. وتعيشى يامصر ياغاليه .. فى الدنيا كده أعلى مناره .. احنا بقى بنتحداكم .. تعبنا جدا وياكم .. قلوبنا دى موش رهباكم .. مصر وسماها رفضاكم .. معدش فينا ذرة خوف .. يا كل ظالم بكره تشوف .. بركانا جاى عليك هيطوف .. هيمحى طبعا جبروتك .. تتمنى فيه لحظة موتك .. بطل وكان عامل شاطر.. ليه ياعينى صبح عريان .. بسطوته يقتل فينا .. عيونه ما تدمعش علينا .. كأنه مش من أهالينا .. بعد النهارده محال نتهان .. صدورنا مفتوحه عشانك .. تعالى ياللا ياخوف يا جبان .. علشان بلادنا كارهينك .. ده حتى ما صونتش دينك .. ارحل بقى موش عاوزينك .. خلينا نحضن ثورتنا .. وتضمنا تانى عيلتنا .. ده عار علينا بعد اليوم .. لو حد فينا يبات مهموم .. ايدينا فى ايدين ثوارنا .. احنا اللى هنطفى نيرانا .. بينا نحقق أحلامنا .. علشان منقولش ياريتنا .. ولا احنا باقى مننا ايه ؟ *(شعر/ اشرف حنفى على)* **********************************************************