كتبه / اسامة طايع - مدير جمعية 7 مليون
نشره / احمد عبادى

بسم الله الرحمن الرحيم
ليه ؟
السؤال ده للمجلس القومي لشئون ذوي الإعاقة
ليه أسئلتنا ملهاش رد ؟
ليه المعاقين مش موجودين في أولويات أمين عام المجلس ؟
ليه في غموض وإحنا كأصحاب شأن مش عارفين إيه المصير للمجلس ؟
ليه أصحاب الشأن والنشطاء اللي بيحتكو بالناس مباشرة
وعانوا من أجل المجلس
ده مش موجود ولا واحد فيهم في المجلس ليه الإقصاء ده ؟
لية....
متوقعين إننا معاقين تحت الطلب ؟
أنا حضرت مؤتمر يوم الأربعاء الماضي اللي كان عملو
المجلس القومي لشؤون الإعاقة في مجلس الطفولة والأمومة في المعادي

وكان الموعد المحدد الساعة 2 وكان موجود ذوي الإعاقة من محافظات كتير يعني
الطريق كله كان في عز الشمس والحر
وبدأ المؤتمر الساعة 3وربع تقريبا
وأعضاء المجلس عرفو أنفسهم والأمين العام د هالة عبد الخالق عرض بعض أهداف المجلس
وبعد كده قالو الوقت تأخر هناخد 3 تعليقات من الناس لولا تعليق منا قال
إحنا جايين نسمع ولا نتكلم
د هالة تفضلت شاكرة انها مدت الوقت وسمعت من الناس وانا في نهاية اليوم
طرحت بعض الأسئلة ولكني لم أخد أي إجابة عنها
وتجاهلو اسألتي واخدو سؤال حد تاني بعدي
وكانت اسألتي
* هيا ليه المجلس مفهوش ولا شخص من النشطاء اللي بيعبروا عن صوت
اغلب المعاقين وبيحتكو بالناس مباشرة وهم من نفس المستوي الطبقي بتاع
اغلب الناس وهم اكتر حد يقدر ينقل الصورة الحقيقية لمعانات المعاقين
وكان ليهم دور كبير في إن المجلس ده يكون موجود
*والسؤال الثاني كانت د هالة قالت في عرضها للمجلس
قالت ان المجلس هو
الكيان الوحيد اللي من حقه يقدم قانون ذوي الإعاقة لمجلس الشعب القانون
اللي بنجري عليه بقالنا سنين وهو كمان فيه فصل كامل عن المجلس ومعايره
وأعضاء المجلس فكان
* سؤالي مدام المجلس هو اللي هيقدم القانون والقانون
فيه فصل عن المجلس القومي يبقا لضمان الشفافية المجلس ده لازم ينزل قرار
ان مفيش ولا شخص من الأعضاء المعينين الان يعين مرة ثانية نهائي عشان
مينفعش حد يحط قوانين وان المجلس ده هو الي هيضع الائحة والمعاير لاعضاء المجلس في المرات القادمة نفسه وده احنا تناقشنا فيه كتير في ورش عمل مقترح
إنشاء المجلس وبردو مكنش فيه إجابة
*وسألت كمان اننا في ورش عمل إنشاء المجلس كان المفترض ان أعضاء المجلس
اول مرة يكونو معينين وبعد كده يكون بالإنتخاب وكنت عايز اعرف توضيح ايه
مصير المجلس ده
*وسؤال كمان ان المجلس المفترض انه يكون 51% من اعضائه من ذوي الإعاقة
كأعضاء مجلس إدارة سؤالي هل فعليا المعاقين ممثلين ب 51%
وتم تجاهل كل اسئلتي ومكنش فيه اي إجابة وبعد المؤتمر د هالة كلمتني وحدد
معي موعد لمقابلة
يوم الأحد الماضي 1 \7في المجلس القومي للطفولة والأمومة اللي في
المعادي عشان نتناقش في اسألتي
وانا من شبرا الخيمة واخبرتها اني عندي مشوار في مصر الجديدة الساعة 4
عصرا وكان الموعد الساعة 12
وذهبت وفضلت قاعد لحد الساعة 2 ظهرا وبعدها لقيت اعتزار علي التأخير واني
اروح اقابلهم في مصر الجديدة
وطبعا معرفتش اروح لان الوقت كان عدي وكان لازم اروح المشوار بتاعي
تم تحديد معاد تاني اليوم الثلاثاء الساعة 2 بعد الظهر في مصر الجديدة
وقالو انهم هيأكدو عليا قبلها ولكن بردو تجاهل تام مش عارف ليه
ده مستقبل 15 مليون شخص ونفس وانا واحد منهم وناشط وكمان ممثل جمعية وحركة حقوقية
من حقنا ككيان نعرف مصيرنا ايه ومتحفظين علي اللي بيحصل ده وكمان
التجاهل الغير مبرر
وانا برفض اكون انسان تحت الطلب ده لو بيعتبروني انسان اصلا
بجد انا حزين ومستاء جدا لموقفهم ده ومش عارف لما احنا مش في اولويات
المجلس القومي لشئون الإعاقة وبنبتديها كده هيكون ايه اللي جاي؟؟
انا بتكلم في مصلحة عاملة تخص الجميع وانا منهم
وبكده احنا لازم توضح لينا الامور بشكل واضح وصريح
وبالفعل احنا بنجتمع عشان نشوف الإجراء اللي هنتخذوه للتصدي للغموض ده
هنتبع الشكل القانوني والإحتجاج الشعبي او الأثنين معا

المصدر: الاستاذ اسامة طايع - مدير جمعية 7 مليون معاق
7milliondisable

فريق عمل الموقع

  • Currently 0/5 Stars.
  • 1 2 3 4 5
0 تصويتات / 211 مشاهدة

جمعية7مليون معاق

7milliondisable
جمعية7مليون معاق مشهرة برقم3809 ـ بتاريخ 5/1/2011 ـ وهي جمعية للاهتمام بالأشخاص ذوي الإعاقة بمختلف أنواعها:(الحركية-البصرية-الذهنية-السمعية ) »

تسجيل الدخول

عدد زيارات الموقع

127,549