هوامش
*********
( هامش الصفحة)
.. تذكير بحلمين وقعو
من جيبك المخروم
وسطرين من قصيدة
زرجنت خالص
حصالة الاحزان
مفيهاش مكان لجنية
والبيانو البردان
مبيطلعش صوت خالص..!!
والقطه زهقت 
من البسكوت ابو شاي
وفاتورة الحلم
الشهر ده 
جابتك ع الحديده...!!!
( العنوان الرئيسي )
البت اللي بتحبها
حلوه قوي ....
احلى من فرحة
جون ابو تريكه
ف الصفاقسي
ومن بوسة كاترينا كيف
ف (بانج بانج )
كل ما بتبص 
لعنيها 
بتعرق وتتلخم 
وتلوص
ولما بتحضنك
بترتجف...
زي اللي راكبه جن
ما تحب علي قدك...!!!
:
ف العالم الموازي..
الشمس زي الشمس
الحرف هوه الحرف 
والناس شبه الناس
وانا بحبك زي ما انا
لكن ب500 ضعف ...!!
( عناوين الأخبار )
*اختفاء معظم
زراير القمصان 
ف الدولاب
ودمعه محبوسه
ف عينك من 17 سنه
* الشمس هتبطل 
تشرق يوم التلات
* اصحابك اللي 
ماتو كلهم
موجودين ع القهوه
بيتريقو عليك....!!
* الغنوه اللي قلت فيها
( كنت بحس برعشة اديه
من قبل ايدي ما تلمسو 
كانت تقولي ديما عنيه
العمر كله هيخلصو
وف يوم وليله معرفش ليه
حسيت مشاعري بيرخصو
وقال لي فجأه عشنا يومين
وكانو لازم يخلصو ..!!!! )
لو غناها عمرو دياب
مكنتش هتليق 
عليه خالص
* انجلترا خرجت 
من الاتحاد الاوربي 
وانت كمان 
لازم تخرج
م التلاجه ....!!!
* البت اللي لعبت
بيك الكوره
وانت عندك 
شد عضلي 
عجبني قوي 
لما استعدت فورمتك
انك شوطتها ف المقص...!!!
*لما تيجي 
تبوس حبيبتك
متغمضش عنيك 
هتضيع اجمل 
لحظه ف حياتك
لما تشوفها
وهي مغمضه ....!!!!
(صحة توقيع )
انا الشاعر
وانا الداعر
وانا الواعظ
وانا القديس
انا ارخص تراب فيكي
واغلي من كل نفيس
خليط ممزوج
وتركيبه 
غريبه ضاربه ف جذورك
وحبيني 
لو ملاك طاهر 
وسامحيني ...
لما اكون ابليس...!!!
************
هشام ابراهيم
24/7/2016