عـــــــتاب

لسه فاكره تيجي ليا
تيجي تبكي قصاد عنيا
بس قلبك هان عليا
حتي فات وقت الدموع
*********
فين ضميرك لما خنتي
بعتي قلبي بالرخيص
وأشتريتك رغم عني
قولتي عني كان خسيس
*********
جايه ليا وظاهرة حزنك
فاكرة قلبي كتير حنون
م النهاردة هخلي قلبك
يدوق مراره لو يخون
*********
إبكي دمعه وألف دمعه
إبكي دم بلاش دموع
مهما تبكي ولاتشكي
قلبي قال دا مفيش رجوع
*********
هان عليكي قلبي عاشق
هان عليكي إزاي تخوني
هان عليكي جرح قلبي
وإنت قلبك بين جفوني
*********
كنتي نجمه في سمايا
كنتي نقطه في جبيني
كنتي جوه دم قلبي
ليه تقيدي فـ نار أنيني
**********
تهون عليكي إزاي دموعي
دموع بتجرح في العيون
وتهدمي في طريق رجوعي
وتزرعيه شوك وظنون
**********
دوقي مره معني حيرتي
وقد إيه معني الدموع
ياما قلبي كان بيصرخ
حتي داب زي الشموع
**********
هنسي قلبك أيوه هنسي
هنسي حيرتك لأ ولسه
وهنسي ليكي أي ذكري
حتي قلبي ياما يقسي
*********
سيبي قلبي باللي بيا
أوعي تبكي قصاد عنيا
أصل قلبك هان عليا
حتي فات وقت الرجوع