راااائعه فى حب مصر للموهوب الشاعر احمد البحيرى

في حب مصر
بيقولوا عنك أنك أنتي
أغلى أسم في الوجود
أقسم بشرفي إنك حبيبتي
وحبك عدى كل الحدود
يا اللي وهبتك كل حياتي
ويشهد عليا خمس شهود
قلبي وربي ورسله وعقلي
وأهلك أنتي عُزّل وجنود
يا اللي وصفك نهر كلام
ما تهزهوش جبال وسدود
ست الكل ما فيش كلام
من أيام جدود الجدود
صح سكتنا كمان على حقك
أنما بقى للصبر حدود
واللي لسانه هايعدي حدوده
أعتبريه دا مش موجود
لأني وشرفك أنتي يا غالية
ما هاسيب حقك ياكله الدود
وأنا من اليوم راح تشوفي شغلي
وتقولي إني مليان صمود
ومن النجمة هاصحي أخواتي
حنا ومينا وعبد الودود
ونطلع كلنا على أشغالنا
وما هنستخسر أي مجهود
ولو هاموت أموت يا بلدي
لو هايكون لك أنتي وجود
**********
ما تقوم بينا يا عبد الهادي
بطول الوادي نصحي الناس
بلدنا عمالة علينا تنادي
هو أيه .. ما فيش أحساس ؟
بتقول إلحق إبني وعمّر
قبل ما تشرب مر الكاس
أصل بلدنا العين عليها
وفي كام واحد عايزها مداس
فز و قوم نعمل بعيشتنا
قبل الفاس ما تقع في الراس
أصل الضربة الجاية قوية
دي حقيقة مش شعر وخلاص
قوم بينا نبني يمكن أبني
بكرا يعيش مرفوع الراس
قوم بينا نبني يمكن أبني
بكرا يعيش مرفوع الراس
بقلم / أحمد البحيري