ميزو : أنا بأحب كُرة القدم يا كابتن حلوانى !
مُصطفى الحلوانى : طب روح أُطلب إيدها مِن أبوها يا عِزت !
ميزو : أنا مُش بأهزر يا حلوانى،أنا عاوز أشتغل فى الكورة .
مُصطفى الحلوانى : إنت حبيبى مِن أيام الإبتدائى؛وهأخليك تشتغل مُدرب،بس أنا عاوز الحلاوة الأول !
ميزو : هأروح أشتريلك نص كيلو هريسة،وهأجى فى هوا .
مُصطفى الحلوانى : نص كيلو هريسة هاهاهاها ؟!
ميزو : النص شوية ؟ طب هأجبلك كيلو !
مُصطفى الحلوانى : هاهاهاهاها
ميزو : طب إنت عاوز إيه بس،يا حلوانى ؟!
مُصطفى الحلوانى : أنا عاوز ألفَين جنية،وتصور لى : شهادة ميلادك ، و البطاقة الشخصية ، و المؤهل ، وموقف التجنيد ، والفيش ، وصورتَين ليك .
ميزو : حاضر بس المُشكلة أنى ملعبتش كورة فى أندية !
مُصطفى الحلوانى : سهلة،شهرتك مِن النهاردة الكابتن ميزو،وفوت عليا بُكرا ، ومعاك الأوراق،والفلوس .
ميزو : أغير اسمى ليه؟!
مُصطفى الحلوانى : دا اسم شهرة ، لزوم الشغل !
أه على فكرة أنا هأجبلك إفادة أنك لعبت عندنا فى قِطاع الناشئين فِرود .
ميزو : بس كدا تزوير، يا حلوانى !
مُصطفى الحلوانى : الكابتن زيزو،ولا لعب فى أندية،ولا فى الشارع ،ولا يعرف حاجة عن الكورة ،وشغال مُدرب ،دا حتى اسمه الحقيقى ،عبدالعزيز !
ميزو : طب ،وبعد الإفادة ،يا حلوانى ؟!
مُصطفى الحلوانى :خُد الإفادة ،وروح خُد دورة فى التدريبِ بألفَين جنية ،وهات الشهادة ،وأنا هأشغلك مُدرب .
ميزو : كُل ده هيكون جاهز .
مُصطفى الحلوانى : تمام ، يا كابتن ميزو ؛ عليه العوض فى كُرة القدم فى مصر !
ميزو : عليك العوض ، يا رب !
#عليه_العوض
(ملحوظة : لقد كتبت تلك القصة ، ونشرتها على الإنترنت ، يوم الأحد الموافق 18ديسمبر مِن عام 2016م )
