رئيس الوحدة المحلية : منور مكتبى ، يا حاج .
الحناوى : دا نورك ، يا قلاوى ، بيه .
رئيس الوحدة المحلية : إنت عاوزنى فى حاجة، يا حاج ؟!
الحناوى : بصراحة والله عوزك فى خدمة بسيطة !
رئيس الوحدة المحلية : أمرك ، يا حاج .
الحناوى : أنا عاوز أبنى بيت صغير لكركر ؛ علشان أجوزه فيه .
رئيس الوحدة المحلية : طب أنا دخلى إيه بالموضوع ده ، يا حاج ؟!
الحناوى : ما هو البيت هيبقى على أرض زراعية !
رئيس الوحدة المحلية : بس دا ممنوع ، يا حاج ؛ إنت عارف نظام مملكة ساسان .
الحناوى : ما هو مُش هيبقى ممنوع بشيك ب100ألف جنية !
رئيس الوحدة المحلية : إنت بترشينى فى مكتبى، يا حاج ؟!
الحناوى : طب تيجى نروح مكتب تانى ؟
رئيس الوحدة المحلية : بس أنا مركزى حساس ، يا حاج ؟
الحناوى : 200ألف جنية !
رئيس الوحدة المحلية : طب ، وضميرى ؟!
الحناوى : خمسة جنية ، يبقى المجموع 200ألف ، وخمسة جنية .
رئيس الوحدة المحلية : بس دى رشوة ، يا حاج ؟
الحناوى : اعتبرهم هدية منى لبهية بنتك ؛ حلوة الفكرة دى ؟!
رئيس الوحدة المحلية : فكرة عسل ، يا حاج !
الحناوى : بس مُش عاوز كركر ، يعرف باللى حصل .
رئيس الوحدة المحلية : ابنك مجنون وهيفضحنا فى المملكة ، يا حاج !
الحناوى : ما أنا مُش عاوزه يعرف ؛ علشان كدا !
رئيس الوحدة المحلية : أمرك ، يا حاج .
الحناوى : تاخد فيزا ؟
رئيس الوحدة المحلية : أنا بحب الكاش ، يا حاج !
الحناوى : كُل اللى فى المملكة يعرف أنك بتحب الكاش !
رئيس الوحدة المحلية : هو أنا مشهور فى المملكة أنى مُرتشى ، يا حاج ؟!
الحناوى : دا إنت مشهور فى كل الممالك اللى إنت مسكتها ، أنك مرتشى ، وحرامى !
رئيس الوحدة المحلية : أنا مُش لواحدى اللى بأخد فلوس علشان أسلك مصالح لناس ، يا حاج !
الحناوى : اللى بيسلكوا المصالح معروفين ، يا قلاوى ، بيه !
#امتى_الانتخابات_المحلية_مِن_2008_والمحليات_خربانة؟!!!
(ملحوظة : تاريخ كتابة تلك القصة القصيرة ، ونشرها على الإنترنت يوم الأربعاء الموافق 7يونيو 2023م )
