بقلم -محمدُ حمدى
جمالات : شوف الولية عاملة إزاى،يا سى حنفى ؟!
حنفى : بتبصلنا بصة بقرف؛أنا لازم أخش استحمى،أنا موش مستنى العيد،أنا هأستحمى دلوقتى !
جمالات : على إيه يا خويا؛دا جعانين،كلها شهرين،والعيد يجى !
حنفى : يعنى أستنى العيد ؟!
لينا : دا بيتكلموا علينا،يا مسعود !
مسعود : دول ناس مفيش وراهم غير الكلامِ،ياروحى !
جمالات : دا بيقول : "إننا مفيش ورانا غير الكلامِ،يا سى حنفى" !
حنفى : إحنا مفيش ورانا غير الكلامِ ؟!
مسعود : هو حد كلِمك،يا جدع إنت ؟!
جمالات : شوف،يا خويا،الراجل الكداب !
لينا : قليلة الأدب إنتى !
مسعود : هاهاهاهاها الله أكبر هاهاهاها،شوف بنت العز بتقول لمرتك إيه : "قليلة الأدب إنتى" هاهاهاها !
حنفى : أنا مراتى قليلة الأدب ياض؟!
مسعود : والله،اللى على راسه بطحة يحسس عليها !
حنفى : إنت شايف نفسك،ياض !
مسعود : أه أنا لسه شايف نفسى فى المرايا فيها حاجة دى ؟!
حنفى : قاعدين مع نفسكم طول الليل،وطول النهار،وقاطعين النفس !
مسعود : إحنا ناس بنمى مواهبنا فى وقتِ الفراغ،مُش زيكُم،مفيش وراكُم غير البحلقةِ،وطول اللسان !
جمالات : مواهب ؟!
حنفى : وبتنمى مواهِب إيه بسلامتك ؟!
مسعود : إحنا بنستغل وقت الفراغ يا عجل؛المدام بترسم،وأنا بأكتب قصص،وأنشرها على الفيس بوك،والتويتر،والإنستقرام،والإنترنت !
لينا : أنا قعدت مرة مع مدام مسيو حنفى،يا مسعود،كانت بتتكلم عن غُرف النوم !
مسعود : شوف الثقافة يا جاهِل،بتقول : "مدام مسيو حنفى " ! كانت بتتكلم عن إيه ؟!
لينا : غرف النوم !
جمالات : غُرف نوم،يا صفرة،يا عيانة ؟!
لينا : إنتى سوفاج !
مسعود : هاهاها قالت لمراتك بيئة بالفرنساوى هاهاهاها !
جمالات : ربنا يعدى الأيام دى على خير !
لينا : بينا يا مسعود؛علشان نصلى الضُهر !
مسعود : بينا ياروحى،دول ناس غاوية رغى على المصاطب،على الفاضى،والمليان .
😂🤣😂🤣😀