عد النجوم تسبيح ما دام ..
هتعدها هتعدها ..
اللي خلقها كتير خلق ..
أشواق تجاوز حدها ..
ونجومك اللي جبال هموم ..
تسبيحة واحدة تهدها ..
*
يا مسكنانا ف بيت حروف ..
برا الجهات الأربعة ..
حاولت تشتتنا الظروف ..
بس القلوب متجمعه ..
وازاي يهز القلب خوف ..
وانتي الدموع وقت الدعا ..
*
وانتي اشتياقي للرجوع ..
وانتي ارتباطي بالوطن ..
بعدك ما عادش تراب وأرض
وغنوتين برا الزمن ..
وعرفت ايه معنى الحنين ..
وفهمت ايه هو السكن ..
*
مابقيتش لايق ع النكد
ولكل غرب ف قلبي شرق
واسمي القديم بقي ليه نغم
وسرح في حبر حروفه برق
انا غيره لكن بشبهه
انا زيه لكن بيننا فرق
*
تضربني شمسك في السحر ..
وأنا بدر غاير في الخيال ..
تبرق في حُمّايا الدموع
المستحيلة
بميت سؤال ..
فيرد صمتك من بعيييييد:
الضرب في العاشق حلال
_____________________
أغاريد الجيل الجديد/ إسلام هجرس
ساحة النقاش