محتاج سما أبعد
ـــــــــــــــــــــــ
افتح كتابك
واقرا معايا ما تيسرْ مِنّك
يمكن هوّا صوتك ينشف دم تعويرة فـ ملامحك
فتعشقك تاني
افتح كتابك وابتسم/ كَشّر
اضحك/ وعيّط
اصرخ قوي/ اسكت
اجري فـ شوارع روحك الضلمة
اهمد فـ أول ما تلقى حجرها كنبة/ استريح
بوسة/ كُباية عصير رُمّان شفايفها
لونها البرونزي مستفز لطلعه منك للسما التامنة
مفيش سما تامنة؟؟؟
طلّع قلمها الروج من الشنطة..
ارسم فوق شفايفها..
سما أولى
ـــــــــــــــــــ
وفيها الكُرة والملعب..
ولد من خنقته بيحُط بدماغُه هدف فوز الفريق التاني ويطرد حارس المرمى ويكملوا ناقصين
سما تانية
ـــــــــــــــــــ
وفيها العيد ومراجيحُه.. وشلة من عيال بايظين وبيعبوا القزايز رمل يقلد المولوتوف وبيحدفوه على بعض
تلميذ على السبورة بيجاوب سؤال فـ الجبر بقصيدة لـ”نزار”
سما تالتة
ـــــــــــــــــــ
وفيها أم بتعيّط..
و”خال” من فوق مدلدل نُصُّه م البلكونة وبيشخط ولد فاشل..
ومنُّه قلب متنطط بيحدف طوب وبيرد الشتيمة عليه
وإصرار روح على الطيران لوش النور
سما رابعة
ـــــــــــــــــــ
وفيها غُربة وابتهالات..
وناس بيصلّوا على كورنيش
ودرويشة وشيخ منصر..
وبحر.. وموج فـ هيجانُه بيدخل جَريّ ع الشقة يكهرب كل جدرانها..
وأرضيتها يطلع منّها أنياب..
ويفضل كل مَنْ فيها مقرفص بين بلاطها وسقفها على طول
سما خامسة
ـــــــــــــــــــــــ
وفيها بنات..
سجاير فرط
وهيدروليك خراطيم ونار من صهدها جِنّيّه مهووسه بإيقاع الفالس بتطلبك للرقص
سما سادسه
ـــــــــــــــــــــــ
وفيها عجوز فـ بيت شكلُه قديم جداً..
وباب لازم توطي دماغك المرفوعة للسموات عشان تدخل
وأبوك جنبك بضحكة بتشبهُه لوحدُه -جميلة بشكل-
زير قاعد فـ ركن الأوضة بينَقط..
وبوتاجاز طوله تقريبًا -مانيش فاكر- على حصيرة و عليه بَرّاد..
وجنبه كبايات فضة بتغمز لُه
وإيد من ع السطوح نازلة على السلم..
وبتملس على شعرك وبتطبطب على كتافك
-(حصان أبيض- وحالة يتم م الأصحاب)..
وخمسة جنيه مِطَّلّعها أبوك من جيبه وسايبها على الطبلية..
ويشيلك على كتافُه بضحكة أحَنّ وبتمشوا
سما سابعة
ـــــــــــــــــــــ
وفيها أرض أول مرة بتشوفها..
وضلمة وكائنات من نور..
وعصافير طايرة فوق راسك فـ مناقيرها لعب أطفال..
وجوابات من بنات مكتوبة بالقلم الرصاص والكُحل
وجُملة من إنجيل “يوحنا” تملي تشوفها فـ الأحلام..
و”برنابا” على عتبة كنيسة بيعيّط وماسكة فـ إيده “طَرّحْ الورد” واقفة بتبتسم..
وبتقرا من مزامير “داوود ”
ساعة هجوم الأوليا حانت . من حِتَّة واحدة منوّرة فـ روحك بِيطُل جيش منهم..
بِيروّض العصافير..
ومن مناقيرها بيشد فـ خطاياك الجميلة المُربكة وفـ حجر “طَرّحْ الورد” يرميها..
(مناديل ورق متبقعه بالروج..
لاب توب فيه أول بروفة لخطة الطيران..
“أنا” كبرياؤه الغبية ورفضه للشارع..
صوته إللي سرقُه الشيطان فـ الحلم بعد ما خطفُه من خواطر بنت مسيحية حدوتة بتبتهل للرب فـ روحه يشبكها..
سيجارتُه.. صوابعه حواليها مشبك غسيل معقود..
الجلطة المفاجأة من امتلاك المجرمين للأرض..
(ونطة البراويز من ع الحيطان وسرقة المشهد)
بتمد إيدها وتحضن الضل إللي منّك نور ونس..
وبتقرا (قل يا عباد ) وتكمل بواقي الآيه نزف
سما تامنة
ـــــــــــــــــــ
وحدك فـ حضرة…. مفيش حاجة
وكأن لسه مفيش حاجات
لسه ما اتخلقتش أرض..
ولا بحر ولا عفاريت..
ولا حتى آدم نفسه طل من العدم
أنت الوحيد..
منّك حتبتسم الحقايق كلها.. وتنُط شمس
___________________________________
أغاريد الجيل الجديد / أحمد الخدرجي
http://www.facebook.com/abosaadkw
ساحة النقاش