احترس من عدوك:
بطلت مخدرات وبقى لك كثير مبطل..بس لازم تخلى بالك من عدوك اللىبيغازل خيالك..ييجى يقولك ده إحنا الحبايب..ليه من مدة عنى غايب...إوعى ترجع إوعى تضعف نصرة قوية مكتوبالك...عدوك بيقول حبيبك ماتصدقوش ماترحلهوش...لو هو جالك إنت أقوى وما ترحموش...عدوك اسمه مرض الإدمان
أنا حبيبك إدمان ..لو نسيتنى أنا مش قادر أنساك-لو عايز تفضل مبطل مخدرات...احترس من عدوك
عدوك جواك...احترس من نفسك لأنها ممكن تغلبك وما تقدرش عليها...مش مهم بقى لك قد إيه مبطل....مش مهم حياتك اتحسنت قد إيه بعد ما بطلت الفترة دى....مش مهم إنت قد إيه بقيت قريب من ربنا...بس لازم تعرف إنك لسة مدمن....يعنى لسه فى مرض جواك..مرض انتهازى شوية قاعد يفكر ييجى لك منين...يعنى لو إديته فرصة حيقفز وينطلق للسطح مهللاً بنشوة الانتصار عليك.....
مش معنى كلامى إنك تفضل خايف ومرعوب استمر فى كل نشاط بتعمله لاستمرار التوقف عن المخدرات...يعنى صلاتك وقربك من ربنا وكل الروحانيات اللى اتعلمتها حافظ عليها طبعاً.. وكمان حضورك للاجتماعات اليومية كل ده بيقول إنك فعلاً مصر على إنك تحترس من عدوك اللى بيتربص بيك
أقولك على حاجة....قول لعدوك كل يوم مش النهاردة...يعنى أجل الموضوع لو فضل حبيبك ...قصدى عدوك إدمان بيلح عليك إنك تروح له...وكل يوم وكل ليلة تعدى من غير ما تسمع كلامه إرفع إيدك للسما وقول الحمد لله....يوم كمان عدى من غير مخدرات
د.نهلة نور الدين حافظ
أخصائى الطب النفسى رئيس وحدة الطب النسى والإدمان للأطفال والمراهقين
