رقيتك يا ابنى واسترقيتك
من اللى بيسرق جوا بيتك
وشايل شنطة حصانته
ف دولاب الخيانة
موقف أسدين
فوق ضهر المعانة
رقيتك
من الدبدوب
ومن حرس الغيوب
ومن شافط نافخ
ف الجيوب
رقيتك
من الحوت
والنبوت
والشفوت
واللى فارد جسمه عارى
ع الشطوط
رقيتك
من جلمبو
وسامبو
وابو دراع
والحلبة
والنعناع
ولسعة الشوربة
الخالية من الدسم
ومن الغشم
والملقح جتته
ع النغم
رقيتك
م الفلوس
واللى بيعرف يدوس
واللى طفى ف ليلة ضلمة
الشمعة
والفانوس
رقيتك
م العروس
واللى باكتب
ف اليوتيوب
والفيس
واللحم الرخيص
والبورنو
واللى حرنوا
والفطيس
رقيتك
من شرى
وبرى
وعمرى اللى صدرته
بحرفى وسرى
رقيتك
بالعود
والكامنجة
والحلانجة
واللى معجون ف العجين
والطين
والبورصة
والطحين
رقيتك
واسترقيتك
مع انى
منتظر زيتك
رقيتك
ومش عارف
هاتبيتنى واللا
هاتطردنى من
بيتك
