100ألف أهلا مرحبا
إحنا بتوع المصطبة
والنرفزه والطبطبة
والسهوكه والأنتكة
وكل حاجة مفبركة
نقول عليها تكتكة
ونخش م السيكا لصبا
100ألف أهلا مرحبا
إحنا بتوع المصطبة

***
مرحب يادفعه
ياللى ماسك خدمتك
ممعكشى غير
سلاح ولقمة وسترك
واقف بتحمى اللى حبك
واللى نفسه يموتك
بيختبر صبرك وعزمك
أو صلابة قوتك
موتة تاخد اللى جابو
اللى رباه واللى سابو
اللى صاب الكلب صابو
كلهم فداء جزمتك
مرحب يا دفعة
ياللى ماسك خدمتك

***
محمدين قال إنتباة
الكل ياخد موقعو
ياللى رافضين الحياة
خدو الكلام منى إسمعو
المصرى عمره ما إنهزم
ولا إتطرح ولا إتقسم
فى قلبه حافظ القسم
وبروحه يحمى مدفعه
وإنتو إطرحو ولا أضربو
ولا إجمعو
بكره هاتيجو لحد عندو
وتشبعو
وتزرعو وتقلعو
وتلطمو
وتصوتو وتدمعو
إنتو مش فارقين معاه
ملايين مستنية نداة
محمدين قال إنتباة

***
والصول ميلاد قالك صفا
ماتلم نفسك يا أفا
إحنا اللى حامين الحدود
والضربة من إيدنا شفا
منخفشى مل الموت نعشقو
وترابها ده نتنشقو
بلادنا أغلى صدقو
وبردها أجمل دفا
الشمس تجرى ف جلدنا
تحمصو
وقلوبنا ساجدة لربنا
وتقدسو
أنتو أقعدو واتشمسو
ولا إدفسو
فى العلن أو فى الخفى
الصول ميلاد قالك صفا

إجمد وحوش الدبدبا

***
100الف أهل مرحبا
إحنا بتوع المصطبه
والنرفزه والطبطبا
والسهوكة والأنتكة
وكل حاجة مفبركة
نقول عليها تكتكة
ونخش م السيكا لصبا
100ألف أهلا مرحبا
إحنا بتوع المصطبة