الجمعة راحت ضحوا بيها
الجمعة جت
والمحتوى محتاج مقشة تنظفه
زى الشوارع ف القلوب
ورصيف بعيت ع العيال
مع إن حضنه لمهم
بيصفى منهم كل يوم
ف بق النهاية المنهكة
غربال
نشفت دموع المرتجى
رفعت رايات الخوف ترفرف
فوق ضهر محنى للمحال
صلصل مجسم يا ابن آدم
وشيطان بيلعب جلجلة
مين اللى قال
إنك قوى
كلك بيعزف ع الفساد
بص لورا
بص لصالح
أو لعاد
تلقى الإزاز كسره العناد
والملحمة
إنك غسلت الشوف بروحك
واتوضا منك سرحتك
بين الشريفة والأمة
طلع الخطيب فوق المنابر
مع إنه شارب كاس ف بيته
والشوارب
مترين يلفوا جيوش لمينا
باصص لنا
وعنيه بتمخر ف الساعات
العمر فات
هو اللى غدى
زى اللى هارب م الغدى
بعزأ كلام
مرصوص بأسمنت وفولاذ
الورد قطب جبهته
ما بقاش معاذ
الكل نام
وشخير بيلطم ف الأنام
مجرى هنا
مجرى هناك
وسفين عقول ف جمعتك
ضلت طريقها
وفستق الريق اتبلى
بمرار كبير
دليسبس خانق ف العرابى
وجيوشنا ف التل الكبير
دخلها أفران الخيانة
معرفش ليه
تخطيط غلط
واللا زلط
أصبح رمال
عبرت رياح الجلجلة
والصلصلة
نفخت سمومها ع الجبال
الجمعة راحت ضحوا بيها
والخطيب مصلوب ف شبرا
وسط الموائد
والجرائد
جوا بقه
فخذة جمال
الجمعة جت
الجمعة راحت
عوض علينا ربنا
نحنح ف بحر العين
سؤال
