يهوذا ببيبيع الخليل 
لو تسمحوا 
عدوا النهار وافتحوا 
حنفية الليل الحزين 
النسر واقف ع الجبل 
والفار بيحفر ف الوتين 
مليون سحابة حملت 
ف بطنها قبل المخاض 
عشق الحياة 
واتبتلت دمعة بتحكى ملحها 
لما العصا شقت 
ف ضهر البحر 
شعر الملحمة 
والمرحمة قلبت نجاة 
يا سارية 
من فوق منابرك ياعمر
شوفت مخرج نصرته 
ودخان بيخرج من لحاك 
لما البطون طلبت رؤاك 
وعجوز بتهزأ بالأمير 
كل النوارس فتحت 
عين الشتا 
والبرد بقرص ف الودان 
شعبان بزق الوقت يرحل 
رمضان بكوم ف الذنوب 
للمحرقة 
مع إننا 
هولوكستنا 
ما اقدرنا نجنى من وراه 
مليار دينار 
فالسونار 
ماشيين وراه 
بنت ولد
والعمدة مشدود السند
وغفر حجر 
زى المدر 
بيسوق قفانا للوتر 
يعزف أناه 
ومسيلمة جمع عقول 
ملهاش عقول 
بتقول نعم 
زى النعم 
خلى الصلاة 
صبح وعشا 
والمغربية والضحى والعصر 
من منخله 
سقطوا هباء 
ما عاد يفيد الانطواء 
ولينطلق كل النساء 
بين الرجال 
وسجاح بترقص ع الحبال 
فين النضال 
ماركس هنا فتح الهويس 
كارتر بينفخ ف البضاعة 
والسوق عطس 
لما فطس 
م الضحك عثمان القتيل 
ونقوم ..ننام أحلام كتيرة 
من دون ما نكتب ع السطور 
أو ننتزع منا الفتيل 
سهران لفجر الديك يأدن 
يهوذا ببيبيع الخليل 
زى يوسف قبل منه 
والحسن ويا الحسين 
نفس القضية من يومين 
فى اليمن 
الكل باع 
الأمين والمؤتمن 
حتى الخريف 
ف مصارعة حرة مع الربيع 
ونجوعنا خايفة الليل يحط
مع إنه حط 
واللط صاب الأفئدة قبل الجسد 
من شر حاسد أو حسد 
عقد ومسد
وام القبيح فردت غباءها ع النبى 
مونتجمرى ف أرضنا 
لغم ثمارنا للأبد 
مدد مدد
والخارجية مقصرة 
مع إن هتلر ف الحقيقة 
قدام صهاينة بينهبوه 
خلوه مرة 
واحنا نطاطى 
لما ناكل فول حراتى 
ونعيش له كورس 
مين قال لحورس 
احنا بقيتا كتير ولكن 
متبعترة 
قلوبنا زى المندرة 
كله بيجلس دون حساب 
نرجيلة يشرب 
أو بياكل لحم منه 
على سيخ نهايته 
كان كباب 
عاشورة منسوخ بالصيام 
واحنا نسخنا الضوء بليل 
الانتقام 
نقتل ونبنى للشهيد
على طول مقام 
كتبت صحيفة ألف كلمة 
بدون حروف 
إننا 
هج التاريخ من سطرنا 
وبقينا طيف 
زى السراب