أنا "حد".... ماحدش يقدر - يوم - يشغلني عن "اللي شاغلني بجد".
طول عمري باقدم سبت فـــ سبت... فــــ سبت.....
ولا مرة حسبت حساب "للحد"!!
حدوتة ستي زمااان كات عن حداية؛ عنيها جمرة نااار....بتطق شرار... وتخَطَّفْ فــ الكتاكيت!!
وامي تغني لي كماااان؛ عن حداية... خطفت راس عيل من فوق المشاية!!
وبدل ما أخاف من غناويهم والحواديت...
طرت في ليلة ضلام ورا حداية...واناديها:-
..... فين الكتاكيت؟!.... فين راس الواد؟!
تنعق كغراب البين... وترفرف كالوطاويط!!
وتقول يا فكيك...
- مش سايبك غير لما "أعـــــــــــــرف" فين؟!
خطفتني الحداية؛ ومَرّْت كالطيارة من فوق قضبان سكة حديد...
وفـ لحظة... لقيت سِلَّايِةْ نخل راشقة في خدي...
وجسمي مِشَضَبْ من تنغيز السلة...
وأنا متشعبط في سبَاطِةْ نخلة بلحها حَيَّاني!!
زي اللي "حدانا".... فـــ حد الغيط التحتاني.
وأنا ازعَّق في الحداية....
وهي تقطَّع فـ اكمامي
- "على فين وخداني"؟!
.... "طيب أغير ريقي ببلحة"...
جبدتني بحدة...
وفجأة حدفتني في "لـَـــــــــحْد"!!
أتْلَفِّتْ هنا وهناك والاقيلكم على مدد الشوف "أحدب" بيحرجم على "جنية بحر"!!
لمحوني فمدوا إيديهم الاتنين...
ولقيتني معاهم في جنينة ما لهاش حد!!
المشمش نايح....
واليوسفي معاه طارح!!
طب تيجي ازااي؟
ده بيطلع في الصيف والتاني فـ عز البرد!!
مديت إيدي على واحدة مشمش فلقيتها في "حداقة المش"!!
قالت الجنية: أنت جنانك فاق الحد!!
كده مش ممكن تستنى ولا حتى لحد الصبح...
عارفين ليه: لأني لما قطفت الثمرة بانت لي حقايق...
واترفعت ستر المحجوب!!
ركبني الأحدب على ضهر حمار حَدَاويِهْ بِتْلُقْ...
ع البعد لمحت "11" منحوتة فـــ جبهة أبويا...
ودموع عينه سايلة لحد الأرض!!
حطوني في حِجْر امي...
- مالك... لابسا اسود ليه؟!
قالت:-.... كنا عليك فـــ حداد!!
فِضْلِتْ ستي تمسح على جسمي...
ولسانها يردد: "حدارجة بدارجة... من كل عين زارجة"!!
نمت لحد الليلة التالتة!!
لكن ما تركتش حبل حماري... من ذاك اليوم
ولا نسيت الأحدب والجنية...
ولا تاري عند الحداية... ولا هي كمان نسيت!!
مرة..... زغرت لي بعينها فادحرجت على السلم...
وحد مقشة جريد شق دماغي اتنين....
خدوها لي 11 غرزة من غير بنج!!
لما "اترندجت" شوية... كانت تزغر لي الحداية....
فالقاني بابَرَّق قوي في عنيها!! وأهَبِّش في الهوا وكأني هاطير... فتهج!!
حددت لنفسي – مرة – طريق محدود بحديد قضيبين زي بتوع القطر.
جه حد بكل بجاحة .... خطف القضيبين وعطاهم للحداد!!
عاوز يعمل منهم كام "ترويسة".....
يحدد بيها حدود الأرض اللي نهبها "بوضع اليد"!!
ماسْكِتِّش... رحنا القسم...
قال: حد الله....وحديد وبعيد.... أنا جدي ورثني القضيبين دول...
ومعاه شهد الحداد!!....
واتقفل المحضر!!
واتأبج مأمور القسم بصرة مال... وبأكتر من وعد:-
"لو دخل الناهب للمجلس يترقى المأمور...
.... أما لو شَكِّلْ خصمي حكومة... يبقى المأمور ناظر داخلية"
طب فين في الدنيا العدل؟
وازاي هاخد حقي ومن مين؟!
طال التفكير فادحدرت فـــ دوحديرة "الإلحاد"!!
قال واحد: يللا نقيموا عليه الحد...
وبحد السيف هانقص رقبته.
نطيت على ضهر "حمار الاحدب"...
وفضل يعرج بي لحد مكان مهجور...فاتح على طريقين.
- طب هامشي في أي طريق؟
.... وده رايح بي على فين؟ وده هايوديني لفين
ولقيت "هاتف" بيحدتني:-...... الاتنين على حدْ سواء...
وعليك وحدك تختار... قبل ما تيجي سنة 2000
فاخترت....
حدفني اللي اخترته في مدينة كبيرة...
ماحدش فيها يعرف حد...
كل اللي قابلني استغرب...
إزاي "أدخل بحماري" في زمان "ما بعد حداثي"؟!
مرسومة الدهشة في وشوش كل اللي صادفني...
لكن... أول يوم مالقتش اللي حاورني.
ولا حد شاورلي لحد الآن....
في اليوم التاني؛ ربطت حماري في عمود نور ودخلت القهوة...
قام حد مهيب جَرّْبِدْ كرسي بأيديه....
وهبد نفسه جنبي عليه؛ وسألني:-....
- مين فين يا حِدِقْ؟!
بصيت له بحدة... ورديت: وأنت بتسأل ليه؟!
قال لي هاينفعني...
قام خد بياناتي....
وصِوَر شهادتي...
وتاني يوم شغلني...
وبعد 11 عام بانحت في الصخر...
يمكن يعطوني "الحد الأدنى للأجر"!!
- طب "موت يا حمار"!!
****
الجيزة في 17 يناير 2014