بلاغ منى لأشلائى
واكهرب حسك المنقوع ف شرايينى
بصدمة تفوق التايه
والم الدهشة ف عيونك
تمرجحنى
واطير بجناح من الملكوت
تدغدغنى الصور تجرى
ببحر الحلم أعبرها
واكون هلفوت
اذا ما بنيت صروح عاشق
ملوش راشق
غير سهام حبه
أمرمر جرح واخدنى
لحد البوح
واشفى الألم م الحس
واخلى النوح
يغيب عنا ف كهف الوحدة
والتوحيد
عمارة خوفنا مبنية
بدون ترخيص
وشرطة أمننا بتضحك
ما هربتشى
عليها الليل بيتكسر
قزاز روحى بيتستر
وراه سرب الهوى العاطش
لحرية تمنها الدم
وأنشودة كتمها الخوف
على اديهم وساقها الهم
قطيع حامل فصيل عصفه
ما برغبشى حنين ناشف
وعيش ما شربشى غير جوعنا
خريف طالل على ضلوعنا
بيقتل كل آمالنا
ربيع حالنا ما بيضللش
كأن الشمس ما طلعت
على دروبنا
غايب عنها
هويس نيلك
أطفى النمل فوق خدى
ووسع مسحة المعجب
وأستعجب
بأن صفاقة الأرغول
غنا معدى
وحرف الناى بيرشف حزن
فوق خيمة عروقها عيال
بترقص حجلة الدارس
عيون فارس ما هيش شايفة
لغير بكرة
بيسرى انوار ف شرايينها
أبعد العزة نرضى لها
نفس خسة
وان الحلم راح يهرب
بكهف الهجرة لمدينة
سبقها غروب
أبعد البرد وشراسته
ونوم ع الرصيف قاسى
وموت فاتح دراعاته
لكل ربيع بيتنسم
عبق وحياة
ماليش فيك سوى حبى
قواريرك
حمام زاجل بيرمى مناه
سمعت الآهة فى صدرى
ومن صدرى
ضجيج العمر منظومة
بتتعرى على دربك
ولون خطبك ف منشورك
بقى سيعة
من الياسمين الى الضبعة
خيال قلبك بقاله زمان
عيدان جافة
وسرحة طيفك العشقان
بلا حافة
واهى الأرصاد بقت عامية
ما بتفرق مابين زهرة
بتتتفتح وبين دبور
بيتخلق
عنية خايفة تتعشم
فتلحس جمرة مزروعة
ورا الجدران
وباب خلفى بيتمعشق
فى نور باصص فى ثقب الروح
هى العنقا بدت تظهر
ومش باقى لأنهارك
تفك طلاسم الفيضان
وأزميلك
يشكل صورة لبهية
بتحضن كل أحلامك
ترضعها حليب شمسك
وتبنى العشق ف الساحة
وتنده يا الله يا موسى
عصاك ثورة على الجبروت
دا نيروزك بقى تحرير
وما اتجمعش غير وطنى
بينده دم شريانه
على الملكوت
ما بيهموش
حاشية بلون إسود
وسرب غيلان بيتربص
لصوت نادى
تعيشى يا مصر
وشال موته على كفه
وشاف آسية مع فرعون
بلاغ منى لأشلائى
ها نتجمع ف روح أمى
ها تبقى عالية ف الدنيا
وكل الكون
تسمعنا خفافيشهم
وتحت الصخر والمجنون
صهيل الصحوة بيأدن
صهيل الصحوة دنيا ودين
