آه يا جدع
من كلمتك
لما بتطلع بالمرار
مخلوطة بيها ضحكتك
اصلك جميل
مشبوك وف ايديك الوجع
لكن جدع
وعشان ماتحلا خطوتك
غُنَاك ومالي سكتك
واخد قرار
ممنوع يا حزن الانتظار
ومافيش ركون جنب الالم
رافع علم
يحيا الرضا
مسكونة روحك بالهدى
اه يا سلام
لو يلمحك حبه الفرح
القاك في قلب الريح تطير
فوق في السما
ويا الاماني الممكنة
يعلى الغنى
مانت البسيط
عاشق لكلمة مستقيم
مانتاش حويط
ولا بير حياتك كان غويط
عالوش باينة الروح ملامح
عايش في دنيا الحب سابح
تمحي الدموع مالأمكنة
واخد بايد الغرقانيين
وانت الغريق
ومهما لف الكون دا بيك
ربك حميك
طول مانت روحك طيبة
رافع علم
يحيا الرضا
مسكونة روحك بالهدى
شفاف في دنيا مليها زيف
جواك نضيف
ولا عمر يوم شوفتك ضعيف
إنسان أوي
شايلاك امواج الانسانية
تحط فيك
لو مرة تخرج مالمدار
تنده عليك
وتغرقك
بدموع عينيك
ترجع عنيد
ماددد لقلبك الف ايد
تظهر بسرعة بسمتك
متمردة
تمسح دموع الإنكسار
تعلن خطاوي الإنتصار
ترفع علم
يحيا الرضا
انسان اكيد
مسكونة روحك بالهدى
#منار_الابياري
